چیف الیکشن کمشنر سکندر سلطان راجہ نے کہا ہے کہ الیکشن کمیشن کا آج اہم اجلاس طلب کیا گیا ہے جس میں حلقہ بندی کے دورانیے کو مزید کم کرنے کے بعد الیکشن کمیشن انتخابات کے شیڈول کا اعلان کرے گا۔
الیکشن کمیشن آف پاکستان کی طرف سے جاری کردہ پریس ریلیز میں بتایا گیا ہے کہ آج الیکشن کمیشن آف پاکستان کا مشاورتی اجلاس گرینڈ ڈیمویٹک الائنس کے وفد سے ہوا۔ اجلاس کی صدارت سکندر سلطان راجہ چیف الیکشن کمشنر نے کی۔ اجلاس میں معزز ممبران الیکشن کمیشن کے علاوہ سیکرٹری ودیگر سینئر افسران نے شرکت کی۔
گرینڈ ڈیمویٹک الائنس کی طرف سےمحترمہ فہمیدہ مرزا، ڈاکٹر صفدر علی عباسی صاحب، جناب کاشف نظامانی، ابن محمد شریک ہوئے جبکہ سردارعبد الرحیم اور عرفان اللہ خان مروت نے ویڈیو لنک کے ذریعے اجلاس میں شرکت کی۔
وفد نے الیکشن کمیشن کے نئی حلقہ بندی کرنے کے فیصلہ کی مکمل تائید کی اور کہا کہ حلقہ بندی شفاف انتخابات کی بنیاد ہیں۔ لہذا نئی مردم شماری کے مطابق حلقہ بندی کا کام مکمل کیا جائے اور انتخابات نئی حلقہ بندی کے بعد کرائے جائیں۔ علاوہ ازیں انتخابی فہرستوں کی تجدید بھی کی جائے تاکہ انتخابی فہرستوں میں ووٹ کا اندارج ، حذف اور درستگی کرائی جا سکے۔
انہوں نے مزید کہا کہ الیکشن کمیشن کے احکامات کے مطابق تمام صوبائی افسران کی ٹرانسفروں کو یقینی بنایا جائے۔ چیف الیکشن کمشنر کے نگران وزرائے اعلیٰ کو خط لکھنے کے باوجود ٹرانسفر پوسٹنگ نہیں کی جا رہی ہیں۔
انہوں نےمزید کہا کہ ریٹرننگ آفیسر غیر جانبدار افسران کو لگایا جائے۔ اگر ممکن ہو تو ڈسٹرکٹ الیکشن کمشنروں اورمختلف وفاقی سروسز کے آفیسروں کو ریٹرننگ آفیسر تعینات کیا جائے۔ مذکورہ بالا تمام انتظامات کو مکمل کرنے کے بعد الیکشن شیڈول کا اعلان کیا جائے۔
وفد نے الیکشن کمیشن سے مطالبہ کیا کہ الیکشن کمیشن نے جو ایکشن پلان تیار کیا ہوا ہے، اس پر سختی سے عمل ہونا چاہیے۔
وفد نے کہا کہ تمام بلدیاتی اداروں کو انتخابات تک معطل کیا جائے اور ایڈمنسٹریٹرز تعینات کیے جائیں تاکہ شفاف انتخابات کو یقینی بنایا جائے۔
چیف الیکشن کمشنر نے کہا کہ آئین اور قانون کے تحت شفاف انتخابات کروانا الیکشن کمیشن کی ذمہ داری ہے۔ انہوں نے کہا کہ آپ کی پارٹی کی مختلف تجاویز انتہائی اہم ہیں۔ الیکشن کمیشن ان تجاویز کو قدر کی نگاہ سے دیکھتا ہے اور ان تجاویز پر آئین وقانون کے مطابق الیکشن کمیشن فیصلہ کرے گا۔ انہوں نے کہا کہ الیکشن کمیشن حلقہ بندی کے کام کی شفافیت کو یقینی بنائے گا۔
چیف الیکشن کمشنرنے وفد کو بتایا کہ دیگر جماعتوں سے مشاورت اور اُن کے فیڈ بیک کو مدنظر رکھتے ہوئے الیکشن کمیشن کا آج اہم اجلاس طلب کیا گیا ہے جس میں حلقہ بندی کے دورانیے کو مزید کم کرنے کے بعد الیکشن کمیشن انتخابات کے شیڈول کا اعلان کرے گا۔
