پاکستان پیپلز پارٹی (پی پی پی )نے الیکشن کمیشن کو خط لکھ کر ترقیاتی فنڈز کو روکنے کا فیصلہ واپس لینے کی درخواست کی ہے۔
پاکستان پیپلز پارٹی ( پی پی پی ) کے رہنما سینیٹر تاج حیدر نے چیف الیکشن کمشنر کو خط لکھا ہے جس میں کہا گیا ہے کہ عوامی فلاح و بہبود کی ترقیاتی اسکیموں کے لیے فنڈز کو منجمد کر دیا گیا ہے۔
مزید پڑھیں
خط کے متن میں کہا گیا ہے کہ عوام اس وقت بدترین لوڈشیڈنگ اور مہنگے بلوں کا سامنا کر رہے ہیں اس لیے سولر پینلز کی فراہمی کی اسکیم کے لیے فنڈز کو منجمد کرنا تعجب انگیز ہے۔
پاکستان پیپلز پارٹی ( پی پی پی ) کے سینیٹر نے کہا کہ الیکشن ایکٹ کے تحت نگراں حکومت جاری ترقیاتی اسکیموں کو نہیں روک سکتی، امکان ہے کہ نگراں حکومت کے بجائے الیکشن کمیشن نے ترقیاتی فنڈز روکے ہیں اگر ایسا ہے تو الیکشن کمیشن نے فلاح و بہبود کی اسکیموں کے فنڈز روک کرغیر آئینی قدم اٹھایا ہے۔
تاج حیدر نے مزید لکھا کہ سیلاب متاثرین کے لیے 20 لاکھ گھروں میں سے 50 ہزار گھر3 ماہ میں تعمیر کیے گئے جب کہ سیلاب متاثرین کو ان کے گھروں میں داخل ہونے کی اجازت نہیں دی جارہی۔
تاج حیدر نے خط میں مزید لکھا ہے کہ ہمارے بازار بند ہیں، بجلی کے بل جلائے جارہے ہیں، عوام سڑکوں پر ہیں اور ایسا موجودہ غلط پالیسیوں کے باعث ہے، ترقیاتی اسکیم کے تحت سندھ میں 21 لاکھ گھروں میں سولر پینلز لگنا ابھی باقی ہے۔
خط کے متن کے مطابق تاج حیدر نے کہا کہ منجمد فنڈز جاری کر کے ہم اپنے عوام کو اندھیروں سے روشنیوں میں لاسکتے ہیں، آئینی مباحثے سے ہٹ کر بھی ترقیاتی اسکیموں کا ایک انسانی پہلو ہوتا ہے اور یہی انسانی پہلو ہماری اولین ترجیح ہونا چاہیے۔
