ماہم عامر ایک بہت ہی باصلاحیت اداکارہ ہیں اور وہ ورسٹائل کردارادا کرنے کے لیے جانی جاتی ہیں۔ وہ پروین اکبر کی بہو، فیضان شیخ کی بیوی اور رابعہ کلثوم کی بھابھی ہیں۔
وہ خود بھی اپنی ایک الگ پہچان رکھتی ہیں اور اب وہ اپنے شوہر فیضان شیخ جو کہ اس وقت ڈراما سیریل ’تماشا گھر‘ میں کام کر رہے ہیں، کی معاونت کر رہی ہیں۔
ماہم عامر ایاز نے حال ہی میں اپنے ایک انٹرویو میں اپنے بارے میں مداحوں کے ساتھ کچھ حقائق شیئر کیے ہیں۔
انٹرویو کے دوران ماہم سے پوچھا گیا کہ ’ کیا انہوں نے کبھی اپنے بارے میں کوئی افواہ سنی ہے جس نے انہیں ہلا کر رکھ دیاہو؟۔تو انہوں نے جواب میں کہا کہ، انٹرنیٹ پر ان کے بارے میں کافی کچھ کہا گیا لیکن ایک چیز نے ان کے ’طوطے اڑا دیے‘۔ تاہم وہ کیا بات تھی انہوں نے تفصیل نہیں بتائی۔
انہوں نے ایک اور سوال کے جواب میں بتایا کہ ان خبروں میں کوئی صداقت نہیں ہے کہ ماہم عامر جب کسی ڈرامے کے سیٹ پر ہوتی ہیں تو وہ روزانہ کے 6 لاکھ روپے وصول کرتی ہیں، یہ باتیں محض یو ٹیوب پر ہی پھیلائی جاتی ہیں۔
ماہم عامر نے کہا کہ ڈراما سیٹ پر ایک دن میں 6 لاکھ روپے معاوضہ لینا تو ایک ملین سال میں بھی ممکن نہیں، تاہم اداکاروں کو اشتہارات میں کام کرنے پر اچھا معاوضہ مل جاتا ہے ۔
