اسلام آباد میں مرد کلرک کو ہراساں کرنے پر خاتون کیخلاف شکایت درج

ہراسانی کیخلاف عورتوں کے تحفظ کے لیے قائم وفاقی محتسب کی عدالت میں اسلام آباد کے ایک کالج کلرک کی جانب سے خاتون پرنسپل کیخلاف دورانِ ملازمت ہراساں کرنے کی شکایت سامنے آئی ہے۔

اسلام آباد ماڈل کالج برائے طالبات جی11 میں تعینات کلرک کی جانب سے مبینہ طور پرڈیوٹی کے دوران ہراساں کرنے پرکالج پرنسپل کیخلاف وفاقی محتسب کی عدالت میں شکایت درج کرائی گئی تھی، جس کے بعد وفاقی نظامت تعلیمات نے اس ضمن میں انکوائری کمیٹی بھی تشکیل دی تھی۔

میڈیا رپورٹس کے مطابق ہراسانی کے الزام کے بعد کالج پرنسپل وفاقی محتسب کی عدالت میں پیش نہیں ہوئیں جس کے بعد کارروائی کرتے ہوئے فریقین کو 7 جولائی کو عدالت میں پیشی کا آخری نوٹس دیدیا گیا ہے۔

واضح رہے کہ ہراسانی کیخلاف عورتوں کے تحفظ کے لیے قائم وفاقی محتسب کو موصول ہونیوالی یہ شکایت اپنی نوعیت کی شاید پہلی ہے جس میں کسی مرد نے ملازمت کے دوران اعلیٰ عہدے پر فائز خاتون کیخلاف ہراسانی کی شکایت درج کرائی ہے، درخواست گزار کے مطابق مذکورہ خاتون پرنسپل نے ان کے کالج میں داخلے پر بھی پابندی عائد کردی ہے۔