پاکستان نے مالدیپ کو صفر کے مقابلے میں 3 گولز سے شکست دے کر ساؤتھ ایشیا فٹبال فیڈریشن انڈر 16 فٹبال چیمپئن شپ کے سیمی فائنل میں جگہ بنا لی۔
بھوٹان کے دارالحکومت تھمپو میں کھیلے گئے میچ میں قومی انڈر 16 ٹیم نے شاندار کھیل پیش کیا اور 14 ویں منٹ میں سبحان کریم کے گول کے ذریعے برتری حاصل کر لی۔
عبدالصمد نے 39 ویں منٹ میں پاکستان کی جانب سے دوسرا گول کر دیا جب کہ تیسرا گول خود مالدیپ کے گول کیپر سے ’اون گول‘ کی بنیاد پر ہوا۔
پاکستان کی یہ ٹورنامنٹ میں مسلسل دوسری فتح ہے۔ پہلے میچ میں پاکستان نے میزبان ٹیم بھوٹان کے خلاف ایک کے مقابلے میں 2 گول سے کامیابی حاصل کی تھی۔
واضح رہے کہ 8 ستمبر کو سیمی فائنل میں پاکستان کا مقابلہ گروپ اے کی رنر اپ ٹیم سے ہو گا۔
