شمالی کوریا کے صدر کم جونگ ان رواں ماہ روسی صدر ولادی میر پیوٹن سے ملاقات کے لیے روس جائیں گے۔
امریکی اخبار نیویارک ٹائمز کی ایک رپورٹ کے مطابق کم جونگ ان ممکنہ طور پر روس کو یوکرین جنگ کے لیے ہتھیاروں کی فراہمی کے بارے میں صدر پیوٹن سے تبادلہ خیال کریں گے۔
رپورٹ کے مطابق امریکی حکام نے کہا ہے کہ یہ ملاقات ممکنہ طور پر10 سے 13 ستمبرکے درمیان روس کے ساحلی شہر ولادیوستوک میں ہوگی جس کے لئے کم جونگ ان بکتر بند ریل گاڑی کے ذریعے سفر کریں گے۔
امریکی حکام کا کہنا ہے کہ صدر پیوٹن چاہتے ہیں کہ شمالی کوریا روس کو آرٹلری شیلزاوراینٹی ٹینک میزائل جبکہ کم جونگ روس سے جدید سیٹلائٹ ٹیکنالوجی اور ایٹمی آبدوزوں کےعلاوہ خوراک کی فراہمی چاہتے ہیں۔
واضح رہے بدھ کو امریکہ نے خبردار کیا تھا کہ صدر پیوٹن اور کم جونگ ان نے ممکنہ طور پر ہتھیاروں کی ڈیل کرنے کے لیے ایک دوسرے کے ساتھ خطوط کا تبادلہ کیا ہے ۔ وائٹ ہاؤس کے ترجمان جان ایف کربی نے کہا ہے کہ دونوں ملکوں کے درمیان عسکری تعاون کے فروغ کے حوالے سے بات چیت آگے بڑھ رہی ہے۔ تاہم امریکی حکام نے دونوں سربراہان کے ذاتی تعلقات کی تفصیل بتانے سے گریز کیا ہے۔
اخبار نے دعوی کیا ہے کہ یوکرین جنگ کے آغاز کے بعد امریکی حکام نے مختلف اوقات میں انٹیلی جنس اطلاعات جاری کی تھیں جن کا مقصد شمالی کوریا، چین اور دیگر ممالک کو روس کو ہتھیاروں کی فراہمی سے روکنا تھا۔ امریکی حکام نے کہا ہے کہ امریکہ کے خبردار کرنے پر پیانگ یانگ اور ماسکو نے آرٹلری شیلز کی فراہمی کا منصوبہ ترک کردیا تھا۔
