کراچی میں ’پولیس سہولت سینٹرز‘ کی اپ گریڈیشن کا آغاز کردیا گیا ہے، جمعہ کو انسپکٹر جنرل (آئی جی) سندھ رفعت مختار نے کراچی ساؤتھ میں اپ گریڈ کیے گئے سہولت مرکز کا افتتاح کیا۔
افتتاحی تقریب سے خطاب کرتے ہوئے انسپکٹر جنرل ( آئی جی ) سندھ رفعت مختار نے کہا کہ عوام کی خدمت کرنا عبادت ہے۔ پولیس ملازمت میں عوام کی خدمت پہلی ترجیح ہے، ہمارا اصل کام مفاد عامہ کو ترجیح دینا ہے۔
انہوں نے کہا کہ پہلے مرحلے میں کراچی کے اضلاع میں سہولت مراکز کا افتتاح کیا جائے گا، سندھ کی دیگر رینجز میں بھی جلد ہی عوام کو خدمت مرکز کی سہولت دی جائے گی۔
واضح رہے کہ عوام کو سہولت مراکز سےکریکٹر سند، پولیس کی تصدیقی سند، لرنرز ڈرائیونگ لائسنس، ڈرائیونگ لائسنس، انٹرنیشنل اورڈپلیکیٹ ڈرائیونگ لائسنس، لائسنس کی توثیق و تجدید، ملازمین کی رجسٹریشن، کرایہ داروں کی رجسٹریشن، وہیکلز ویری فیکیشن، گمشدگی کی رپورٹ، کرائم رپورٹس، خواتین پر تشدد کی رپورٹ، ایف آئی آر کی کاپی کی دستیابی جیسی سہولیات فراہم کی جائیں گی۔
