پاکستان پیپلزپارٹی (پی پی پی) کے چیئرمین بلاول بھٹو زرداری نے 90 روز کے اندر انتخابات کرانے کے مطالبے پر قائم رہتے ہوئے کہا ہے کہ میں پیپلزپارٹی کی سنٹرل ایگزیکٹو کمیٹی (سی ای سی) کے فیصلوں کا پابند ہوں، جبکہ گھر کے معاملات پر آصف زرداری کی بات کا پابند ہوں۔
بدین میں میڈیا سے گفتگو کرتے ہوئے بلاول بھٹو نے کہاکہ پیپلزپارٹی کی سی ای سی میں یہ بات طے ہوئی کہ ہمارا اصولی فیصلہ ہے ملک میں آئین کے مطابق 90 روز میں انتخابات ہونے چاہییں۔
چیئرمین پیپلزپارٹی نے کہا کہ اس وقت پاکستان کے عوام مشکل حالات میں زندگی گزار رہے ہیں، ملک کی معاشی صورت حال دن بدن بگڑتی چلی جا رہی ہے، پاکستان کے عوام تو ہمیشہ قربانیاں دیتے رہے ہیں، اب عوام کا حق ہے کہ سوال اٹھائیں کہ حکومت ان کے لیے کیا کر رہی ہے۔
بلاول بھٹو کا کہنا تھا کہ اگر کسی کی یہ خواہش تھی کہ عدم اعتماد کے بجائے ملک میں انتخابات ہوتے تو وہ ہمارا ساتھ نہ دیتے، ہمیں نگران حکومت پر کوئی اعتراض نہیں، بس کیئر ٹیکرز چیئر ٹیکرز نہ بنیں۔
انہوں نے کہا کہ پیپلزپارٹی جب بھی اقتدار میں آئے گی عوام کے مسائل حل ہوں گے، بینظیر بھٹو نے ملک کی معیشت کی سمت درست کی، پاکستان کے جتنے بھی مسائل ہیں ان کا حل منتخب نمائندوں کے پاس ہے۔
