وزارت خزانہ کے سابق مشیر، پبلک پالیسی ایڈوائزر اور ماہر معاشیات ڈاکٹر خاقان نجیب نے کہا ہے کہ پاکستان کو سرمایہ کاری اور پیداواری صلاحیت بڑھانے کے لیے سعودی عرب کے ساتھ مل کر جدید خطوط پر منصوبہ بندی کرنے کی ضرورت ہے۔
وی نیوز کے ساتھ خصوصی انٹرویو میں ماہر معاشیات ڈاکٹر خاقان نجیب نے کہا کہ اس وقت آزاد اور ابھرتی ہوئی معیشتیں دُنیا میں بڑی سرمایہ کاری کرنے جا رہی ہیں۔
پاکستان کو اس موقع سے فائدہ اٹھا تے ہوئے ایسے منصوبے بنانے کی ضرورت ہے جس میں سرمایہ کاری بھی آئے اور وہ سرمایہ کاری منصوبے ملک کی پیداواری صلاحیت کو بھی بڑھائیں۔
انہوں نے کہا کہ ہمیں زراعت میں کارپوریٹ فارمنگ، نئے ایریاز کی تلاش کرنے کی بھی ضرورت ہے جہاں ہم پاکستان کے معدنی ذخائر کو نکال سکیں اور اس کے ساتھ ہمیں دفاعی پیداوار بھی بڑھانے کی ضرورت ہے تاکہ ہم دُنیا میں اپنا ایک نیا نام پیدا کر سکیں۔
مزید پڑھیں
انہوں نے کہا کہ سعودی عرب کے ساتھ ہمارے دیرینہ مراسم ہیں، اس وقت سعودی عرب اپنے ملک کو ترقی دینے کے لیے منصوبہ بندی اور اصلاحات کر رہا ہے ، ہمیں چاہیے کہ ہم بھی سعودی عرب کے ساتھ مل کر اپنے ملک میں اصلاحات لائیں، یہ اصلاحات چاہے ٹیکس کے نظام میں ہوں یا بیداواری صلاحیت کو بڑھانے کے لیے ہوں۔
انہوں نے کہا کہ جس طرح سعودی عرب ماڈرن شہر بنا رہا ہے ہمیں بھی ماڈرن شہر ضرور بنانے چاہییں، جن میں ٹرانسپورٹ کا نظام پبلک سطح پر ہو تا کہ لوگ اپنی طرز زندگی کو بدل کر ماڈرن نیشن کی جانب بڑھ سکیں۔
