استور ضمنی الیکشن: پی ٹی آئی آئی کے خورشید خان باضابطہ طور پر کامیاب امیدوار قرار

استور میں ہونے والے ضمنی انتخاب کے نتائج کا باضابطہ طورپراعلان کر دیا گیا ہے جس کے مطابق پاکستان تحریک انصاف کے خورشید خان کامیاب امیدوار قرار پائے ہیں۔

ریٹرنگ آفیسر کی جانب سے جاری کیے گئے تمام 56 پولنگ اسٹیشنز سے حاصل کردہ عبوری نتائج کے مطابق پاکستان تحریک انصاف کے امیدوارخورشید خان 6,164 ووٹ لیکر کامیاب ہوئے، مسلم لیگ (ن) کے فرمان علی4,899 ووٹ لیکر دوسرے اور پیپلزپارٹی کے عبدالحمید خان 4,125 ووٹ لیکر تیسرے نمبر پر رہے۔

خالد خورشیدکی جعلی ڈگری کیس میں نااہلی کی وجہ سے گلگت بلتستان قانون ساز اسمبلی کی خالی ہونے والی 13 استورون کی نشست پر ضمنی الیکشن کا انعقاد ہفتے کو کیا گیا تھا جس میں ووٹ ڈالنے کا سلسلہ صبح 8 بجے سے شام پانچ بجے تک پر امن طریقے سے جاری رہا تھا۔

حلقے کے کل 56 پولنگ سٹیشنزمیں سے 12 کو حساس جبکہ 44 پولنگ اسٹیشن کو نارمل قرار دیا گیا تھا۔ اس حلقے میں کل ووٹرز کی تعدد 33,378 تھی جن میں مرد ووٹرز کی تعدد 18,231 جبکہ خواتین ووٹرز کی تعدد 15,147 تھی ۔