ملک میں بجلی کے بل صارفین پر بجلیاں گرارہے ہیں لیکن اس سے عام لوگ ہی متاثر نہیں بلکہ پاکستان کے شوبز ستارے بھی پریشان ہیں۔
معروف اداکارہ اور سپر ماڈل نادیہ حسین کو بھی یہی شکایت ہے کہ بجلی کم استعمال کرنے کے باوجود انہیں بھاری بھرکم بل موصول ہوا ہے۔
نادیہ نے حال ہی میں ایک پوڈ کاسٹ میں شرکت کی ہے جہاں انہوں نے مہنگے بجلی بلز پر حکومت کی ناقص کارکردگی پر اپنی ناراضی کا اظہار کیا۔
ان کا کہنا تھا کہ ان کے گھر میں یونٹس کم استعمال ہونے کے باوجود بجلی کا بل بہت زیادہ آیا ہے۔ انہوں بے بتایا کہ’میرے گھر میں جنوری، فروری یا مارچ میں 2500 یونٹس استعمال ہوتے تھے اور بجلی کا بل ایک لاکھ 20 ہزار روپے آتا تھا لیکن اب جب کہ اس ماہ 2012 یونٹس استعمال ہوئے لیکن بجلی کا بل ایک لاکھ 70 ہزار روپے آیا ہے‘۔
نادیہ نے کہا کہ شدید گرمی میں 500 یونٹس کم استعمال کرنے ہر بھی ان کے گھر میں پونے 2 لاکھ روپے بجلی کا بل آگیا۔
اداکارہ نے حکومت سے سوال کیا کہ 500 یونٹس کم استعمال کرنے پر بجلی کے بل میں 50 ہزار روپے کا اضافہ کیسے ہوسکتا ہے؟
یاد رہے کہ اس سے قبل پاکستانی شوبز انڈسٹری کی شخصیات بشمول نادیہ خان، ندا یاسر، فضا علی اور سعدیہ امام نے بھی بجلی بلوں کے حوالے سے کچھ ایسی ہی شکایات کی تھیں۔
