پاکستان مسلم لیگ ن کی چیف آرگنائزر و سینیئرنائب صدر مریم نواز نے کہا ہے کہ جو لوگ نواز شریف کو مائنس کرنا چاہتے تھے وہ خود مائنس ہو گئے ہیں، مگر ایسا کرنے سے پاکستان کی ترقی مائنس ہو گئی۔
خیبرپختونخوا میں پارٹی کے مشاورتی اجلاس سے خطاب کرتے ہوئے مریم نواز نے قائد ن لیگ کو ویلکم بیک کہا۔ ان کا کہنا تھا معمارپاکستان ویلکم بیک! سازشیو گڈ بائے۔
مریم نواز نے کہاکہ 21 اکتوبر کو نواز شریف وطن واپس نہیں آ رہا بلکہ پاکستان کی ترقی و خوشحال کادور واپس آ رہا ہے۔ قائد ن لیگ عوام کو مشکلات سے نجات دلائیں گے۔
مزید پڑھیں
چیف آرگنائزر ن لیگ نے کہاکہ نوازشریف نے اپنے خلاف سیاسی انتقام کا مقابلہ بہادری اور ثابت قدمی سے کیا، ن لیگ کے دور میں ملک ترقی کر رہا تھا مگر سازشی نہیں چاہتے تھے کہ یہ تسلسل جاری رہے۔
مریم نواز نے کہاکہ نواز شریف کے دور میں اشیائے ضروریہ کی قیمتیں کم تھیں، مہنگائی کم ترین سطح پر آگئی تھی، جس کے بعد آئی ایم ایف کو بھی پاکستان سے خدا حافظ کہہ دیا گیا تھا۔ مگر اس سفرکو جاری نہ رہنے دیا گیا۔
لیگی چیف آرگنائزر نے کہاکہ ہم ایک بار پھر اقتدار میں آکر خیبرپختونخوا سمیت ملک بھر کی محرومیوں کا خاتمہ کریں گے، ہم نے دہشتگردی کے ساتھ ساتھ معاشی تباہی سے بھی قوم کو نجات دلانی ہے۔
دریں اثنا مریم نواز کی زیر صدارت نواز شریف کی وطن واپسی اور استقبال کے حوالے مشاورتی اجلاس ہوا جس میں پارٹی قائد کی 21 اکتوبر کو وطن واپسی سے متعلق تیاریوں کے حوالے سے غور کیا گیا۔
واضح رہے کہ سابق وزیراعظم نواز شریف جو اس وقت لندن میں مقیم ہیں، انہوں نے 21 اکتوبر کو اپنی وطن واپسی کا اعلان کیا ہے، جس کے بعد مسلم لیگ ن کی جانب سے استقبال کی تیاریوں کا آغاز کر دیا گیا ہے۔
