پاکستان تحریک انصاف (پی ٹی آئی) نے 90 روز میں انتخابات کرانے کے لیے سپریم کورٹ میں دائر کی گئی درخواست پر رجسٹرار آفس کے اعتراضات کو چیلنج کر دیا ہے۔
پی ٹی آئی کی جانب سے رجسٹرار آفس کے اعتراضات کے خلاف اپیل دائر کر دی گئی ہے۔ جس میں موقف اختیار کیا گیا ہے کہ رجسٹرار آفس جوڈیشل نوعیت کے اعتراضات عائد نہیں کر سکتا۔
اپیل میں کہا گیا ہے کہ رجسٹرار آفس کے اعتراضات کو ختم کر کے درخواست سماعت کے لیے مقرر کی جائے۔
مزید پڑھیں
واضح رہے کہ سپریم کورٹ آف پاکستان کے رجسٹرار آفس نے گزشتہ روز پاکستان تحریک انصاف انصاف کی جانب سے 90 روز میں انتخابات کرانے کے لیے دائر کی گئی آئینی درخواست اعتراض لگا کر واپس کر دی تھی۔
سپریم کورٹ آف پاکستان کے رجسٹرار آفس کی طرف سے درخواست پر اعتراضات عائد کیے گئے تھے۔
رجسٹرارآفس کی جانب سے کہا گیا تھا کہ درخواست گزار نے سپریم کورٹ آنے سے قبل کسی متعلقہ فورم سے رجوع نہیں کیا۔ یہ اعتراض بھی اٹھایا گیا ہے آئین کے آرٹیکل 248 کے مطابق صدر مملکت کو درخواست میں فریق نہیں بنایا جا سکتا۔
رجسٹرار آفس کے مطابق درخواست میں یہ بھی نہیں بتایا گیا کہ درخواست گزار کا کون سا حق متاثر ہوا ہے، یہ بھی کہا گیا ہے کہ آرٹیکل 184 تین کے تقاضے بھی پورے نہیں کیے گئے۔
یاد رہے کہ پاکستان تحریک انصاف نے علی ظفرایڈووکیٹ کے توسط سے عدالت عظمیٰ میں درخواست دائر کی تھی جس میں کہا گیا تھا کہ انتخابات 90 روز میں کرانے کا حکم دیا جائے۔
پی ٹی آئی کی جانب سے دائر کی درخواست میں مشترکہ مفادات کونسل کا مردم شماری کی منظوری کا فیصلہ بھی کالعدم قرار دینے کی استدعا کی گئی تھی۔
