پیپلز پارٹی کے سابق سینیٹر مصطفیٰ نواز کھوکھر ایک نئی سیاسی جماعت کی تشکیل کے لیے پر تول رہے ہیں اور اس سلسلہ میں ان کی ممکنہ سیاسی جماعت میں لیگی رہنما شاہد خاقان عباسی اور مفتاح اسماعیل سمیت حاجی لشکری رئیسانی، خواجہ ہوتی اور کچھ دیگر سیاستدانوں کی شمولیت کا قوی امکان ہے۔
جیو نیوز کے پروگرام کیپٹل ٹاک میں گفتگو کرتے ہوئے مصطفی نواز کھوکھر کا کہنا تھا کہ گزشتہ 3 سال میں تحریک انصاف، مسلم لیگ ن اور پیپلز پارٹی سمیت کوئی جماعت ایسی نہیں جسے حکومت کرنے کا موقع نہ ملا ہو۔
مزید پڑھیں
پی ڈی ایم میں شامل اتحادی جماعتوں سمیت دیگر پارٹیوں کے نام لیتے ہوئے ان کا کہنا تھا کہ کوئی سیاسی جماعت ایسی نہیں جو حکومت میں نہ رہی ہو۔’اپنے منجمد اکاؤنٹ تو بحال ہوگئے، اپنے جو مقدمات تھے وہ تو ختم ہوگئے، اپنے مسائل تو کم ہوگئے مگر لوگوں کے مسائل کا حل کہاں ہے۔‘
مصطفیٰ نواز کھوکھر ایک نئی سیاسی جماعت بنا رہے ہیں اس جماعت میں شاہد خاقان عباسی، مفتاح اسماعیل، حاجی لشکری رئیسانی، خواجہ ہوتی اور کچھ دیگر لوگ شامل ہونگے اس جماعت کو تحریک انصاف ، مسلم لیگ ن اور پیپلز پارٹی کا متبادل بنایا جائے گا pic.twitter.com/l65yT6sZyk
— Hamid Mir حامد میر (@HamidMirPAK) September 19, 2023
اس موقع پر پروگرام کے میزبان حامد میر نے کہا کہ آپ اب لگتا ہے کہ آپ ایک نئی پارٹی بنانے لگے ہیں۔ جس پر مصطفی نواز کھوکھر بولے؛ خواہش بھی ہے، کوشش بھی ہے، میں دوستوں کو قائل کررہاہوں اور کافی حد تک قائل کربھی لیا ہے۔
حامد میر نے جب ان سے پوچھا کہ آپ کی پارٹی میں شاہد خاقان عباسی بھی شامل ہوں گے تو مصطفی نواز کھوکھر کا موقف تھاکہ وہ انہیں قائل کرنے کی بھرپور کوشش کررہے ہیں۔ مفتاح اسماعیل، لشکری رئیسانی اور خواجہ ہوتی کی ممکنہ شمولیت کے حوالے سے پوچھے گئے سوالات پر بھی ان کا یہی موقف تھا کہ وہ سب کو قائل کرنے کی کوشش کررہے ہیں۔
