پاکستان تحریک انصاف (پی ٹی آئی) کا کہنا ہے کہ الیکشن کمیشن آف پاکستان کی جانب سے انتخابات کے انعقاد کی تاریخ کے اعلان کی بجائے مہینے کا تعین باعث حیرت ہے۔
پی ٹی آئی میڈیا ڈیپارٹمنٹ کی جانب سے جاری کردہ بیان میں کہا گیا ہے کہ دستور الیکشن کمیشن کو اسمبلی کی تحلیل کے بعد 90 روز کی مدت مقررہ میں انتخابات کے انعقاد کا پابند بناتا ہے لیکن اب الیکشن کمیشن جنوری کی کسی بھی تاریخ کا تعیّن کرتا ہے تب بھی وہ 90 روزہ مدت سے باہر ہوگی۔
ترجمان کا کہنا تھا کہ 90 روز میں انتخابات کے انعقاد کا معاملہ سپریم کورٹ میں زیرِسماعت ہے اور سپریم کورٹ کی جانب سے معاملے کے حتمی فیصلے تک 90 روز سے باہر کسی بھی تاریخ کو قوم کیلئے قبول کرنا ممکن نہیں۔
پارٹی ترجمان نے کہا کہ الیکشن کمیشن صاف، شفاف اور غیرجانبدارانہ انتخابات کے لیے آئین کے تحت مطلوب ماحول قائم کرنے میں بھی ناکام ہے اور پاکستان کے انتخابی عمل کی سب سے بڑی فریق تحریک انصاف کو بدترین ریاستی جبر کا نشانہ بنا کر انتخاب کی دوڑ سے باہر کرنے کے لیے ایڑھی چوٹی کا زور لگایا جارہا ہے۔
ترجمان کا کہنا تھا کہ دستور کی منشا کے مطابق آزادانہ، منصفانہ اور غیرجانبدارانہ انتخابات ہی الیکشن کمیشن کے ذمے ہے اور یہی ملک و قوم کو بحرانوں سے نکالنے کی واحد سبیل ہے۔
