برطانیہ کے شہر ولوو ہیمپٹن میں شہریوں کے صحت کا ایک نیا اور منفرد پروگرام شروع کیا جا رہا ہے جس کے تحت پروگرام کے شرکا صحت مند غذا کھا کر اور زیادہ سے زیادہ ورزش کرکے پوائنٹس حاصل کریں گے۔ یہ پوائنٹس انھیں اشیائے ضروریہ کی خریداری اورسینما ٹکٹ لینے میں کام آئیں گے۔
دی پائلٹ آف دی بیٹر ہیلتھ ( The pilot of the Better Health ) کے عنوان سے اس پروگرام میں شرکا فری فٹنس ٹریکرز کے ساتھ منسلک ہوں گے۔ جبکہ یہ پوری سکیم ایک ایپلیکیشن کے ذریعے چلے گی۔
اٹھارہ برس یا اس سے زائد عمر کے لوگ اس پروگرام میں شامل ہونے کے اہل ہوں گے۔ کورس بیس ہفتوں پر محیط ہوگا۔
اس مدت میں شرکا کو مختلف اہداف دیے جائیں گے، وہ ہر ہدف حاصل کرنے پر پوائنٹس حاصل کریں گے۔ پروگرام کے شرکا ان پوائنٹس کے بدلے میں چالیس پونڈز تک کا سامان خرید سکتے ہیں۔
سینسبری ، ایلدی ، میریسن ، ٹیسکو جیسی بڑی سپرمارکیٹوں نے اس پروگرام کے لئے وولورہیمپٹن سٹی کونسل سے معاہدہ کیا ہے ۔
برطانوی حکومت نے اس پراجیکٹ کے لئے تین ملین پونڈز کی رقم مختص کی ہے۔
وولورہیمپٹن سٹی کونسل کی بیورلی مومن آبادی کہتی ہیں کہ ان کی کوشش ہے ، زیادہ سے زیادہ شہری اس پروگرام میں حصہ لیں۔ اگر تعداد پچاس ہزار سے بڑھ جائے تو یہ بڑی شاندار بات ہوگی۔
واضح رہے کہ پوائنٹس حاصل کرنے والوں کو ورزشی اور تفریحی مراکز میں بھی خصوصی رعایت دی جائے گی۔
