جماعت اسلامی پاکستان کے امیر سراج الحق نے کہا ہے کہ پاکستان کا قرض اتارنے کے لیے اشرافیہ کے اثاثے بیچ دینے چاہییں۔
کوئٹہ میں مہنگائی کے خلاف احتجاجی دھرنے سے خطاب کرتے ہوئے انہوں نے کہا کہ آزادی کی 7 دہائیاں گزرنے کے باوجود انگریز کا قانون آج بھی موجود ہے، مہنگائی کے باعث 25 کروڑ عوام کے لیے گھر چلانا مشکل ہو گیا ہے۔
کوئٹہ – پیٹرول بجلی کی قیمتوں میں ظالمانہ اضافہ اور بڑھتی ہوئی مہنگائی کے خلاف گورنر ہاؤس کے باہر دھرنے میں ہزاروں افراد شریک ہیں#JIDharnaQuetta pic.twitter.com/cqN7BIEErZ
— Jamaat e Islami Pakistan (@JIPOfficial) September 24, 2023
سراج الحق نے کہا ہے کہ آٹا، چینی، دال سمیت دیگر اشیائے ضروریہ کی قیمتوں میں ایسے اضافہ کیا گیا ہے جیسے یہ چاند سے لے کر آتے ہیں۔
امیر جماعت اسلامی نے کہا کہ بھارت چاند پر کامیاب لینڈنگ کے بعد اب سورج کی جانب بڑھ رہا ہے لیکن ہم ابھی تک آٹے اور چینی کے لیے سڑکوں پر ہیں۔
مزید پڑھیں
سراج الحق نے کہاکہ مہنگائی کے خلاف ہماری یہ تحریک ظلم اور جبر کے خلاف جہاد ہے، ان کا کہنا تھا کہ عالمی مالیاتی اداروں سے قرضے حکمرانوں نے لیے اور واپس عوام کو کرنے پڑ رہے ہیں۔
امیر جماعت اسلامی نے کہاکہ پاکستان میں سستی بجلی پیدا کر کے عوام کو دی جا سکتی ہے مگر یہاں مہنگے تیل سے مہنگی بجلی پیدا کی جاتی ہے جس کی وجہ سے بل بھی زیادہ آ رہے ہیں۔ یہ حکمرانوں کی عوام دشمن پالیسیاں ہیں۔
وزیراعظم انکل! میرے امی ابو کو خود کشی پر مجبور نہ کریں۔
آئی ایم ایف انکل! میں بھی آپ کا مقروض ہوں
بجلی پیٹرول کی قیمتوں میں اضافہ کے خلاف گورنر ہاؤس کوئٹہ کے باہر دھرنے میں شریک بچوں کے تاثرات#JIDharnaQuetta pic.twitter.com/Bszjpg5yUd— Jamaat e Islami Pakistan (@JIPOfficial) September 24, 2023
ان کا کہنا تھا کہ پوری دنیا میں سال میں ایک بار بجٹ پیش کیا جاتا ہے لیکن پاکستان واحد ملک ہے جہاں سال کے 365 روز بجٹ پیش ہوتا رہتا ہے۔
واضح رہے کہ جماعت اسلامی نے مہنگائی کے خلاف ملک گیر احتجاج کا اعلان کر رکھا ہے، اس سے قبل امیر جماعت اسلامی پاکستان سراج الحق نے لاہور اور پشاور میں احتجاجی دھرنوں سے خطاب کیا تھا۔
اس کے علاوہ امیر جماعت اسلامی کراچی حافظ نعیم الرحمان کی کال پر کچھ روز قبل عوام نے پیٹرول کی قیمتوں میں اضافے کے خلاف انوکھا احتجاج کرتے ہوئے گاڑیاں سڑک پر ہی پارک کر دی تھیں۔
