پاکستان ہاکی ٹیم نے ایشین گیمز 2023 میں اپنے افتتاحی میچ میں سنگاپور کو صفر کے مقابلے 11 گولز سے شکست دے کر شاندار فتح حاصل کر لی۔
تفصیلات کے مطابق چین کے شہر ہانگ زو میں جاری 19ویں ایشین گیمز میں اتوار کے روز مردوں کے ہاکی کے مقابلوں کا آغاز ہوا۔ پاکستان نے اپنا افتتاحی میچ سنگا پور کے خلاف کھیلا۔
پاکستانی ٹیم نے شاندار کھیل کا مظاہرہ کرتے ہوئے حریف سنگاپور کو یکطرفہ مقابلے کے بعد با آسانی 11-0 سے شکست دے کر زبردست کامیابی اپنے نام کی۔
پاکستان کی جانب سے ارباز احمد اورارشد لیاقت نے شاندار ہیٹرکس کر کے ٹیم کی جیت میں کلیدی کردار ادا کیا۔ جبکہ عبدالرحمٰن، محمد عماد، افراز، سفیان خان اور رانا وحید نے ایک، ایک گول کیا۔
مزید پڑھیں
ایشین گیمز کے مینز ہاکی ایونٹ کے آج کے مقابلوں میں پاکستان، انڈیا، چین، جاپان، ملائشیا اور کوریا کی ٹیمیں فاتح رہیں۔ انڈیا نے ازبکستان کو 16-0، چین نے عمان کو 3-2، جاپان نے بنگلا دیش کو 7-2، ملائشیا نے تھائی لینڈ کو 9-0 جبکہ کوریا نے انڈونیشیا کو 10-0 سے ہرایا۔
پاکستان ہاکی ٹیم 26 ستمبر کو اپنے دوسرے میچ میں بنگلہ دیش جبکہ 30 ستمبر کو روایتی حریف انڈیا کے مدمقابل ہو گی۔ 19ویں ایشین گیمز میں ہاکی مقابلوں میں بارہ ٹیمیں شرکت کررہی ہیں۔ اس ایونٹ میں سیمی فائنلز 4 اکتوبر جبکہ فائنل میچ 6 اکتوبر کو کھیلا جائے گا۔
