اسلام آباد کی کامسیٹس یونیورسٹی میں غیر اخلاقی سوال کا معاملہ سامنے آ گیا، انگریزی کے پرچہ میں دو بہن بھائیوں میں غیر فطری تعلق کا سوال پوچھا گیا۔
غیر اخلاقی سوال کامسیٹس یونیورسٹی اسلام آباد کیمپس کے پروگرام بی ای ای کے پہلے سمسٹر کے امتحان میں پوچھا گیا، نامناسب سوال پر طلبہ کو 300 الفاظ پر مشتمل چار پیراگراف لکھنے کو کہا گیا ہے۔
غیر اخلاقی سوال پر طلباء کی جانب سے رد عمل سامنے آنے پر وزارت سائنس اینڈ ٹیکنالوجی نے معاملے کا نوٹس لے لیا اور معاملے کی انکوائری کا حکم دے دیا۔
وزرات سائنس اینڈ ٹیکنالوجی کے نوٹس کے جواب میں یونیورسٹی انتظامیہ نے کہا کہ معاملے کی تحقیقات کر لی گئیں ہیں اور انکوائر ی کے بعد ذمہ داروں کے خلاف تادیبی کارروائی کی گئی ہے۔
انکوائری میں وزیٹنگ لیکچرار پرچہ میں سوال شامل کرنے کے ذمہ دار قرار پائے۔
یونیورسٹی انتظامیہ نے سارا ملبہ پیپر وزیٹنگ لیکچرار پر ڈال دیا، انچارج،کنٹرولر امتحانات، رجسٹرار اور ریکٹر جامعہ کو بری الزمہ قرار دے دیا گیا۔
انکوائری کے بعد وزیٹنگ لیکچرار خیر البشر کو نوکری سے فارغ کردیا گیا اور ان پر کامسیٹس میں آئندہ نوکری پر پابندی عائد کر دی گئی۔
