کرکٹ کا عالمی مقابلہ 5 اکتوبر سے بھارت میں شروع ہو رہا ہے، غیرملکی ٹیموں کے بھارت پہنچنے کا سلسلہ شروع ہو گیا، افغانستان کرکٹ ٹیم بھی بھارت پہنچ گئی ہے۔
ورلڈ کپ میں افغانستان کی کرکٹ ٹیم کی اسپانسر شپ ایک بھارتی کمپنی کرے گی۔
مزید پڑھیں
افغانستان کرکٹ بورڈ نے بھارتی کمپنی ’امول‘ کے ساتھ معاہدے پر دستخط کر لیے ہیں۔ ’امول‘ بھارت کے بڑے ڈیری برانڈز میں سے ایک ہے جو افغانستان کرکٹ ٹیم کو اسپانسر کر رہی ہے۔
’امول‘ کا لوگو بھارتی کرکٹ ٹیم کی جرسیوں کے ساتھ ساتھ تربیتی کٹس پر بھی نظر آئے گا۔
بھارتی کمپنی ’امول‘ کے منیجنگ ڈائریکٹر جین مہتا نے کہاکہ افغانستان کے ساتھ ہماری کمپنی کا پرانا تعلق ہے، خان عبدالغفار خان جب 1969 میں بھارت آئے تھے تو کمپنی آفس کا دورہ کیا تھا۔
انہوں نے کہاکہ ہمیں فخر ہے کہ ورلڈ کپ جیسے ایونٹ میں افغانستان کرکٹ ٹیم کو اسپانسر کر رہے ہیں۔
دوسری جانب افغانستان کرکٹ بورڈ کے سی ای او نصیب خان نے کہا ہے کہ ’امول‘ کی جانب سے ہماری ٹیم کو اسپانسر کرنے پر خوشی ہے، ہم مستقبل میں بھی ایک ساتھ کام کرنے کے منتظر رہیں گے۔
واضح رہے کہ افغانستان کرکٹ ٹیم بھارت پہنچ چکی ہے اور اپنی تیاریوں کا آغاز کر دیا ہے۔ افغان ٹیم ایونٹ کے باقاعدہ آغاز سے قبل جنوبی افریقا اور سری لنکا کےساتھ وارم اپ میچز کھیلے گی۔
