خیبرپختونخوا: غیر قانونی افغان شہری بڑھتے ہوئے جرائم کی بڑی وجہ قرار

خیبرپختونخوا میں مقیم غیر قانونی افغان شہریوں کی بڑھتی ہوئی تعداد صوبے میں بڑھتے ہوئے جرائم کی ایک بڑی وجہ ہے، اعداد و شمار کے مطابق غیر قانونی افغان باشندے پاکستان میں متعدد جرائم کی بڑھتی شرح کی اہم وجہ قرار پائے ہیں۔

خیبرپختونخوا افغان پناہ گزینوں کی غیر قانونی سرگرمیوں سے سب سے زیادہ متاثر صوبہ ہے، اس وقت خیبرپختونخوا میں 3 لاکھ 21 ہزار 677 غیر قانونی افغان باشندے رہائش پذیر ہیں۔

خیبرپختونخوا میں افغان باشندے اغواء برائے تاوان، منشیات فروشی، غیر قانونی اسلحہ، ٹریفک حادثات، انسانی اسمگلنگ اور دیگر بڑے جرائم میں ملوث ہیں۔ بہت سے غیر قانونی افغان باشندے خیبرپختونخوا میں مختلف جرائم میں مطلوب ہیں جن میں سے 3911 کو گرفتار کیا جا چکا ہے۔

2014ء سے اب تک 287 افغان باشندے غیر قانونی سرگرمیوں کے باعث گرفتار ہیں جن میں سے 21 کو سزائے موت دی جا چکی ہے، خیبرپختونخوا کی جیلوں میں موجود 432 غیر قانونی افغانیوں کے مختلف مقدمات زیر سماعت ہیں جبکہ 44 افغانیوں پر جرم ثابت ہو چکا ہے۔

ان سارے اعداد و شمار کو مد نظر رکھتے ہوئے پاکستان میں موجود تمام غیر قانونی افغان شہریوں کو ریکارڈ پر لانے کی ضرورت ہے، رجسٹریشن کے بغیر کسی افغان شہری کو پاکستان میں رہنے کی اجازت نہیں دی جانی چاہیے۔

اب وقت آن پہنچا ہے کہ پاکستان میں موجود غیر قانونی شہریوں کو رجسٹریشن کے ذریعے ریکارڈ پر لایا جائے تاکہ ایک منظم طریقہ کار کے ذریعے غیر قانونی افغان شہریوں کی واپسی کا عمل شروع کیا جاسکے۔