لاہور کی مرکزی شاہراہ قائد اعظم (مال روڈ) کو ڈسٹ فری ماڈل روڈ بنایا جائے گا، نگراں وزیراعلیٰ محسن نقوی نے منصوبے کی منظوری دے دی۔
وزیراعلیٰ محسن نقوی کی زیر صدارت وزیر اعلی ہاؤس میں اجلاس منعقد ہوا جس میں سیکرٹری وزیراعلیٰ، ڈپٹی کمشنر لاہور، ڈی جی پی ایچ اے اور چیف ایگزیکٹو آفیسر لاہور ویسٹ مینجمنٹ کمپنی نے شرکت کی۔
اجلاس میں فیصلہ کیا گیا کہ مال روڈ کے اطراف اور گرین بیلٹ میں معیاری گھاس لگائی جائے گی، درختوں کی تعداد میں اضافہ کیا جائے گا، شہر میں بارش کے پانی کو محفوظ رکھنے کے لیے نئے واٹر ٹینکس بنائے جائیں گے۔
یہ بھی فیصلہ کیا گیا ہے کہ تاجروں کی مشاورت سے مال روڈ پر یکساں اور خوبصورت سائن بورڈ لگائے جائیں گے، مال روڈ سے تجاوزات کا خاتمہ کیا جائے گا اور گاڑیوں کی پارکنگ کے نظام کو بہترین بنایا جائے گا۔
مال روڈ پر صفائی کے انتظامات دنیا کے بہترین شہروں کے معیار کے مطابق ہوں گے، وزیراعلیٰ محسن نقوی نے مال روڈ گرد و غبار سے محفوظ ماڈل روڈ بنانے کے حوالے سے متعلقہ محکمے سے حتمی پلان طلب کر لیا ہے۔
