مصنوعی ذہانت کی دنیا میں انقلاب برپا کردینے والی کمپنی اوپن اے آئی نے چیٹ جی پی ٹی میں ایک نئے فیچر کی تصدیق کرتے ہوئے کہا ہے کہ اب چیٹ باٹ کے ذریعے انٹرنیٹ پر موجود حالیہ معلومات تک رسائی حاصل کی جا سکے گی۔
نئی اپڈیٹ کے مطابق چیٹ جی پی ٹی اب آپ کو موجودہ اور مستند معلومات فراہم کرنے کے لیے انٹرنیٹ براؤز کر سکتا ہے۔ اس سے قبل چیٹ جی پی ٹی ستمبر 2021 سے پہلے والی معلومات صرف آپ تک پہنچا سکتا تھا۔
چیٹ جی پی ٹی کی اس نئی اپڈیٹ کے بعد فلحال صرف پریمیم صارفین چیٹ باٹ سے حالاتِ حاضرہ سے متعلق سوالات پوچھ سکیں گے تاہم اوپن اے آئی کے مطابق یہ سہولت جلد عام صارفین تک بھی پہنچا دی جائے گی۔
ChatGPT can now browse the internet to provide you with current and authoritative information, complete with direct links to sources. It is no longer limited to data before September 2021. pic.twitter.com/pyj8a9HWkB
— OpenAI (@OpenAI) September 27, 2023
اوپن اے آئ کے مطابق براؤزنگ خاص طور پر ان کاموں کے لیے مفید ہے جن کے لیے تازہ ترین معلومات کی ضرورت ہوتی ہے، جیسے کہ تکنیکی تحقیق میں آپ کی مدد کرنا، موٹر سائیکل کا انتخاب کرنے کی کوشش کرنا یا چھٹیوں کے لیے جگہ کا انتخاب کرتے ہوئے پلان بنانا۔
برطانوی نشریاتی ادارے بی بی سی میں شائع ایک رپورٹ کے مطابق اس سے قبل اوپن اے آئی نے بنگ سرچ انجن کے ذریعے صارفین کو حقیقی وقت کی معلومات تک رسائی دینے کا تجربہ بھی کیا تھا۔
اوپن اے آَئی کے مطابق اگر آپ OpenAI کے کسی ایک پلان کو سبسکرائب کرتے ہیں اور Bing کے ساتھ براؤز فیچر کو آزمانا چاہتے ہیں، تو کمپنی کی ہدایات یہ ہیں:
‘پروفائل اور ترتیبات’ پر کلک کریں
‘بیٹا خصوصیات’ کو منتخب کریں
‘Bing کے ساتھ براؤز کریں’ پر کلک کریں
GPT-4 کے تحت سلیکٹر میں Bing کے ساتھ براؤز کا انتخاب کریں۔
