آئی جی سندھ کا پولیس کی سوشل میڈیا ٹیم تیار کرنے کا فیصلہ

سوشل میڈیا پر منفی پروپگنڈا کرنے والے اب ہو جائیں ہوشیار کیونکہ آئی جی سندھ نے پولیس کی سوشل میڈیا ٹیم تیار کرنے کا فیصلہ کرتے ہوئے سوشل میڈیا پلیٹ فارمز پر متحرک پولیس اہلکاروں کو طلب کرلیا۔

پولیس ذرائع کے مطابق سندھ پولیس اب سوشل میڈیا پر بھی متحرک نظر آئے گی، سندھ پولیس نے اپنی سوشل میڈیا ٹیم تیار کرنے کا فیصلہ کر لیا ہے۔ آئی جی سندھ رفعت مختار اور ایڈیشنل آئی جی کراچی خادم حسین رند کا پیغام وائرلیس کے ذریعے نشر کیا گیا۔

پولیس کے مطابق سربراہ سندھ پولیس نے سوشل میڈیا پلیٹ فارمز ٹک ٹاک، یوٹیوب، فیس بک میں مہارت رکھنے والے پولیس اہلکاروں کو طلب کیا ہے۔ ایڈیشنل آئی جی کراچی کی جانب سے سوشل میڈیا پر متحرک وہ پولیس اہلکار جو انفلوئنسرز اور بلاگرز ہیں انہیں خصوصی طور پر طلب کیا گیا ہے۔

ترجمان کراچی پولیس کے مطابق سندھ پولیس کے سوشل میڈیا انفلوئنسرز سے آئی جی سندھ رفعت مختار خود ملاقات کریں گے۔

ترجمان کے مطابق سوشل میڈیا پر متحرک پولیس اہلکاروں کو بلانے کا مقصد ان کی سوشل میڈیا سے متعلق قابلیت جانچنا ہے۔