بریانی کراچی کی اچھی ہے یا لاہور کی، اس سوال پر بریانی کے عاشقوں کے درمیان ہمیشہ ہی جنگ کا سماں رہتا ہے۔ بریانی کے حق میں اہلیان کراچی والوں کا دعویٰ ہے کہ اصل بریانی تو کراچی میں ملتی ہے، لاہور والے بریانی کی شان میں گستاخی کرتے ہیں۔
دونوں اطراف سے بریانی کے حق میں دلائل سننے اور پڑھنے کو ملتے ہیں، تاہم اب بریانی کا یہ مقابلہ سرحد پار یعنی بھارت سے بھی ہونے لگا ہے جہاں پاکستان کرکٹ ٹیم ورلڈ کپ کھیلنے کے لیے موجود ہے اور ان کی تواضع بھارت کی مشہور حیدرآبادی بریانی سے کی جا رہی ہے۔
آئی سی سی کی انسٹاگرام سائٹ پر حال ہی میں ایک ویڈیو کلپ جاری کیا گیا ہے جس میں پاکستانی کھلاڑیوں سے پوچھا گیا کہ کراچی کی بریانی اچھی ہے یا حیدرآباد کی اور وہ حیدر آباد کی بریانی کو کتنے نمبر دینا چاہیں گے؟
View this post on Instagram
پاکستان کرکٹ ٹیم کے کپتان بابر اعظم نے حیدرآبادی بریانی کو 8 نمبر دیتے ہوئے کہا کہ یہ بریانی قدرے زیادہ سپائسی ہوتی ہے۔
قومی ٹیم کے فاسٹ بولر حسن علی کا کہنا تھا کہ موڈ پر منحصر ہے۔ اگر بریانی کھانے کا موڈ ہے تو 10 میں سے 10 جبکہ امام الحق نے حیدرآبادی بریانی کے بارے میں کہا ’اٹس فینٹاسٹک‘
اسپیڈ اسٹار حارث رؤف نے کہا ہم نے حیدرآبادی بریانی کا بہت سنا تھا اور آتے ہی سب سے پہلے یہی کھائی میں تو 10 میں سے 20 نمبر دوں گا۔
پاکستان کرکٹ ٹیم کے کھلاڑیوں سے سوال پوچھا گیا کہ کیا ان کو کراچی اور حیدرآبادی بریانی میں کوئی مماثلت ملتی ہے تو جواب میں بابر اعظم کا کہنا تھا کہ حیدر آبادی بریانی میں مرچیں بہت ہیں جبکہ امام الحق نے کہا کہ وہ کسی کے بارے میں نہیں کہہ سکتے کہ کون سی اچھی ہے۔ دونوں ہی بہت مزے کی ہیں۔
