ورلڈ کپ کا کل سے آغاز، ذکا اشرف نے ٹیم سے امیدیں وابستہ کر لیں

کرکٹ کے عالمی مقابلے کا آغاز 5 اکتوبر سے بھارت میں ہونے جا رہا ہے، پاکستان اپنا پہلا میچ 6 اکتوبر کو نیدر لینڈ کے خلاف کھیلے گا۔

روایتی حریف پاکستان اور بھارت 14 اکتوبر کو احمدآباد کے نریندرمودی کرکٹ اسٹیڈیم میں آمنے سامنے ہوں گے۔

قومی کرکٹ ٹیم جیت کے لیے پُرعزم ہے، عالمی مقابلے سے قبل وارم اپ میچوں میں جہاں قومی ٹیم کو شکست کا سامنا کرنا پڑا ہے وہیں بھارتی کنڈیشنز کو جانچنے میں بھی مدد ملی ہے۔

قومی کرکٹ ٹیم نے آج راجیوگاندھی انٹرنیشنل اسٹیڈیم میں پریکٹس سیشن میں حصہ لیا۔

قومی ٹیم ورلڈ کپ جیت کر واپس آئے گی، ذکا اشرف

پاکستان کرکٹ بورڈ (پی سی بی) کی مینجمنٹ کمیٹی کے چیئرمین ذکا اشرف نے قومی ٹیم کے لیے نیک تمناؤں کا اظہار کیا ہے۔

ذکا اشرف نے کہا ہے کہ قومی کرکٹ ٹیم نیک تمناؤں اور دعاؤں کے ساتھ میدان میں اترے گی۔ ہار جیت کھیل کا حصہ ہے، اس وقت پوری قوم اپنی ٹیم کے ساتھ کھڑی ہے۔

چیئرمین پی سی بی نے امید ظاہر کی کہ ہماری ٹیم میدان میں ڈٹ کر مقابلہ کرے گی اور ورلڈ کپ جیت کر واپس آئے گی۔