پاکستان کی پہلی خاتون خلا باز نمیرہ سلیم 6 اکتوبر کو اپنے تاریخی خلائی مشن پر روانہ ہو رہی ہیں۔
واضح رہے کہ نمرہ سلیم پاکستان کی پہلی خاتون ہیں جنہیں قطبین پر پہنچنے کا اعزاز بھی حاصل ہے۔ نمیرہ سلیم 21 اپریل 2007 کو قطب شمالی اور 8 جنوری 2008 کو قطب جنوبی میں پاکستان کا پرچم لہرا چکی ہیں۔
خلا میں روانگی کے حوالے سے ٹریننگ کے پہلے روز گفتگو کرتے ہوئے نمیرہ سلیم نے کہا کہ انہیں اپنے اسپیس سوٹ اور پیرا شوٹ کو درست طریقے سے فٹ کرنے، اسپیس شپ میں سیٹوں کی فعالیت اور اپنی سیٹ بیلٹ باندھنے اور کھولنے کے بارے میں سکھایا گیا۔
نمیرہ سلیم نے خلاءمیں روانگی سے قبل گزشتہ ماہ نگران وفاقی وزیر اطلاعات مرتضیٰ سولنگی سے ملاقات بھی کی تھی اور انہیں اپنے خلائی سفر پر روانگی سے متعلق تیاریوں سے آگاہ کیا تھا۔
نمیرہ سلیم خلا میں پاکستانی پرچم بلند کرنے کا عزم رکھتی ہیں اور ان کا سفر خلائی تحقیق میں پاکستان کی بڑھتی ہوئی موجودگی کی علامت ہے جو قوم کے لیے اہم کامیابی ہے۔ نمیرہ سلیم کی اس کاوش سے پاکستان کے امن پسند اور ترقی پسند ملک کی حیثیت سے مثبت تشخص اجاگر ہوگا۔
پاکستانی بیٹی کے لیے انوارالحق کاکڑ کی نیک خواہشات
دریں اثنا نگراں وزیراعظم انوار الحق کاکڑ نے پاکستانی خلا باز نمیرہ سلیم کے لیے نیک تمناؤں کا اظہار کیا ہے۔
Good Luck Namira Salim @namirasalim.
I wish you success when you’re ready to make history on 06 October by becoming the 1st 🇵🇰 woman to travel to space in the #Galactic04
By proving their mettle as trailblazers in multiple fields, 🇵🇰 women are making the whole nation proud— Anwaar ul Haq Kakar (@anwaar_kakar) October 4, 2023
بدھ کو اپنے ٹوئٹ میں وزیراعظم نے کہا کہ میری خواہش ہے کہ آپ 6 اکتوبر کو کامیابی سے خلا کا سفر کریں اور تاریخ میں گلیکٹیک 4 کے ذریعے فضا میں جانے والی پہلی پاکستانی خاتون کا اعزاز حاصل کریں۔
وزیراعظم نے کہا کہ پاکستانی خواتین ہر شعبے میں اپنی صلاحیتوں کو منوا رہی ہی اور پوری قوم کا سر فخر سے بلند کر رہی ہیں۔