سابق وزیراعظم اور پاکستان مسلم لیگ ن کے صدر شہباز شریف سے لاہور اور پنجاب ٹریڈرز ایسوسی ایشنز کے عہدیداروں اور نمائندوں نے ملاقات کی، ملاقات میں مجموعی صورتحال اور معیشت کے حوالے سے امور پر تبادلہ خیال کیا گیا۔
شہباز شریف نے تاجروں سے گفتگو کرتے ہوئے کہاکہ نواز شریف واپس آکر معاشی مشکلات کے حل کا ایجنڈا دیں گے، مسلم لیگ ن نے ہمیشہ سیاست پر ریاست کو ترجیح دی ہے۔
ملاقات میں تاجروں نے درپیش معاشی مشکلات کے حوالے سے آگاہ کیا، تاجروں نے ملک کو ڈیفالٹ سے بچانے پر بطور وزیراعظم شہباز شریف کی کاوشوں کو خراج تحسین پیش کیا۔
تاجروں نے شہباز شریف کی میثاق معیشت کی تجویز کی بھرپور تائید و حمایت کرتے ہوئے کہاکہ تاجر برادری دل و جان سے میاں نواز شریف کا استقبال کرے گی، تاجروں کے ساتھ میاں نواز شریف کا دل کا رشتہ ہے۔
مزید پڑھیں
تاجر رہنما کا کہنا تھا کہ میاں نواز شریف نے تاجروں کے لیے ہر مشکل وقت میں ساتھ دیا ہے، تاجر کبھی بھی آپ کا اور میاں نواز شریف کا ساتھ نہیں چھوڑ سکتے۔
تاجر رہنماؤں نے گفتگو کرتے ہوئے کہاکہ 2018 سے 2022 کے چار سال بڑے صبر آزما تھے، پاکستان کے مسائل کا حل اب صرف نواز شریف کے پاس ہے۔
حمزہ شہباز نے بھی تاجر برادری سے ملاقات کی
پاکستان مسلم لیگ ن کے نائب صدر حمزہ شہباز نے بھی تاجروں سے ملاقات کی اور اظہار خیال کرتے ہوئے کہا کہ نواز شریف کے اقتدار کا مطلب ہمیشہ تمام طبقات کی خوشحالی اور ملک کی ترقی ہوتا ہے۔
حمزہ شہباز نے کہاکہ معاشی بحالی پاکستان کی بقا اور سالمیت کا مسئلہ ہے، سب کو اپنا کردار ادا کرنا پڑے گا۔ ملک کو معاشی دلدل سے نوازشریف کی قیادت میں صرف پاکستان مسلم لیگ ن ہی نکال سکتی ہے۔
انہوں نے کہا کہ ترقی اور مہنگائی سے عوام کو بچانے کا سفر پھر شروع ہوگا، ہمیشہ نواز شریف ہی قوم کے دکھوں پر مرہم ثابت ہوئے ہیں۔ نواز شریف ہی غریب کے ساتھی، ہمدرد اور مددگار بنے ہیں۔
