چیئرمین تحریک انصاف عمران خان کے اعلان کے مطابق کل بروز بدھ سے جیل بھرو تحریک کا باقاعدہ آغاز ہو رہا ہے۔
اس حوالے سے پی ٹی آئی کے رہنما فواد چوہدری کا کہنا ہے کہ کل سے جیل بھرو تحریک شروع ہو رہی ہے، شاہ محمود قریشی نے کہا ہے وہ کل ہی گرفتاری دیں گے۔
میڈیا رپورٹس کے مطابق فواد چوہدری کا کہنا ہے کہ پی ٹی آئی جیل بھرو تحریک کے لیے تیار ہے۔ شاہ محمود قریشی نے کہا ہے کہ وہ کل ہی گرفتاری دیں گے، اسد عمر نے بھی گرفتاری دینے کا اعلان کر دیا ہے۔
انہوں نے کہا کہ کل لاہور نے جس طرح عمران خان کا استقبال کیا اس نے سب کی نیندیں اڑا دیں۔
فواد چوہدری نے کہا کہ جعلی توشہ خانہ کیس میں ہم سب کو بلایا گیا ہے، پاکستان کی معیشت کے حالات سب کے سامنے ہیں۔
خیال رہے کہ تحریک انصاف کی جیل بھرو تحریک کل سے لاہور میں شروع ہوگی، پی ٹی آئی کا دوٹوک مؤقف ہے کہ عمران خان سمیت کون کب گرفتاری دے گا یہ پارٹی طے کرے گی۔
فواد چوہدری کا کہنا ہے کہ جیل بھرو تحریک ڈویژن کی سطح پر کی جا رہی ہے، کل 2 سو افراد گرفتاری دیں گے۔
تحریک پر مشاورت کیلئے عمران خان نے پارٹی کی اسٹریٹجی کمیٹی کا اجلاس طلب کرلیا ہے۔
علاوہ ازیں جیل بھرو تحریک سے پہلے مال روڈ، مین بلیوارڈ گلبرگ اور سول سکریٹریٹ کے اطراف کے علاقے میں دفعہ 144 نافذ کر دی گئی ہے۔
