مسلم لیگ ن کی اپنے تاحیات قائد نواز شریف کی وطن پر استقبال کے لیے تیاریاں حمتی مراحل میں داخل ہو گئی ہیں۔
سابق وزیر اعظم نواز شریف کی 21 اکتوبر کو وطن واپسی پر ان کی جماعت مسلم لیگ ن نے چیف آرگنائزر مریم نواز کی ہدایت پر ماڈل ٹاؤن سیکرٹریٹ میں کنٹرول روم قائم کر دیا ہے۔
ن لیگ کی جانب سے سابق وفاقی وزیر انوشہ رحمان ، سابق وزیر شزہ فاطمہ ، سابق ایم پی اے راحیلہ خادم حسین، احمد سعید محسن ، بابا فیلبوس، سابق ایم این اے رومینہ خورشید سمیت دیگر کو ذمہ داریاں تفویض کی گئی ہیں۔
مینار پاکستان کتنی گاڑیوں پر کتنے آدمی پہنچیں گے؟ اس حوالے سے ن لیگ نے تکنیکی بنیادوں پر ڈیٹا اکھٹا کرنا شروع کردیا ہے۔ ماڈل ٹاؤن میں قائم مرکزی کنٹرول روم کو پارٹی کے عہدیداروں اور سابق اراکین اسمبلی سے تفصیلات موصول ہونا شروع ہو گئی ہیں۔
ن لیگ کے عہدیداروں کو 21 اکتوبر کو مینار پاکستان پہنچنے کا وقت، گاڑی نمبر، مسافروں کی تعداد بتانا ہو گی، جلسہ کے شرکاء کا ڈیٹا اکھٹا کرکے رپورٹ مریم نواز کو پیش کی جائے گی۔
لیگی رہنماؤں کو گاڑی کا ماڈل اور اس میں مسافروں کی گنجائش کے ساتھ ساتھ مینار پاکستان جلسے میں پہنچنے کا وقت بھی کنٹرول روم کو بتانا ہو گا۔
ذرائع کا کہنا ہے کہ مسلم لیگ ن 21 اکتوبر کے جلسے کے بعد بھی طریقہ کار آئندہ انتخابات کے لیے بھی جاری رکھے گی، ہدف کے مطابق کارکن نہ لانے والے عہدیداروں کو آئندہ عام انتخابات میں ٹکٹ نہیں ملے گا۔
