پاکستان تحریک انصاف کو ہدایت جاری کرتے ہوئے پشاور پولیس نے بغیر اجازت فلسطین کے ساتھ اظہار یکجہتی کے لیے جلوس نکالنے پر قانونی کاروائی کا عندیہ دیا ہے۔ پولیس نے پی ٹی آئی کے قائدین سے جلوس کے لیے ڈپٹی کمشنر سے پیشگی اجازت لینے کی ہدایت کی ہے۔
آج نمازِ جمعہ کے بعد پشاور میں پی ٹی آئی نے اسرائیلی مظالم کے خلاف اور فلسطینیوں کے ساتھ اظہار یکجہتی کے لیے پریس کلب کے باہر احتجاج کا اعلان کیا ہے۔ پی ٹی آئی کے ضلعی جنرل سیکریٹری عاصم خان نے وی نیوز کو بتایا کہ کارکنان پریس کلب کے سامنے جمع ہوکر پر امن طور پر فلسطین کے ساتھ اظہار یکجہتی کریں گے۔
تھانہ چمکنی پولیس نے احتجاج کے اعلان کے بعد سابق صوبائی وزیر تیمور جھگڑا، سابق ایم این اے ارباب عامر سمیت 3 رہنماؤں کے نام ہدایت نامہ جاری کرتے ہوئے انہیں بغیر اجازت احتجاج یا جلوس نکالنے سے منع کیا ہے۔ ’پی ٹی آئی آج جمعہ کی نماز کے بعد فلسطین کے حق میں جلوس نکال رہی ہے۔ لیکن آج کل ملکی حالات کے باعث جلسے جلوسوں پر پابندی عائد ہے۔ اور ڈپٹی کمشنر سے پیشگی اجازت لینا ضروری ہے۔‘
The fascist regime is now trying to stop PTI to protest in solidarity with Palestine.
It’s the first time that a government would stop a political party from supporting our brothers and sisters in Palestine. During the night, there have been raids at workers house too.
Is…
— PTI (@PTIofficial) October 13, 2023
پولیس نے مزید لکھا ہے کہ تحریک انصاف کو بھی جلوس یا احتجاج کے لیے ڈپٹی کمشنر سے تحریری اجازت لینا ضروری ہے۔ بذریعہ تحریری نوٹس آگاہ کیا جاتا ہے کہ بغیر اجازت احتجاج غیر قانونی تصور ہو گا اور قانونی کارروائی ہوگی۔
9 مئی کے پرتشدد واقعات کے بعد تحریک انصاف کھل کر سرگرمیاں نہیں کر رہی ہے۔ پارٹی رہنماؤں کے مطابق سیاسی سرگرمیوں پر ایف آئی آر درج کرکے کارکنان اور قائدین کو تنگ کیا جا رہا ہے۔ پولیس کی جانب سے نوٹس پر تحریک انصاف کی جانب سے ابھی تک کوئی ردعمل سامنے نہیں آیا ہے۔
پشاور میں فلسطین کے حق میں جلوس
مختلف جماعتوں نے آج جمعہ کی نماز کے بعد فلسطین کے ساتھ اظہار یکجہتی کے لیے مختلف نوعیت کے احتجاجی مظاہروں کا اعلان کیا ہے۔ جو شہر کے مختلف مقامات پر منعقد کیے جائیں گے۔ جماعت اسلامی 3 بجے ہشت نگری میں مظاہرہ کرے گی۔
امامیہ کونسل قصہ خوانی سے پریس کلب تک احتجاجی ریلی نکالے گی جبکہ جے یو آئی ف بھی جی ٹی روڈ پر احتجاج کرے گی۔ تاہم اب تک پولیس نے پی ٹی آئی کے علاوہ کسی دوسری جماعت کو کوئی نوٹس جاری نہیں کیا ہے۔
