اداکارہ سارہ خان گزشتہ کچھ عرصہ سے غائب تھیں لیکن اب وہ اپنے فینز کو ایک بگڑی ہوئی لڑکی کے روپ میں بہت جلد ٹی وی اسکرین پر نظر آئیں گی، سارہ ایک بہترین اداکارہ ہیں لیکن سوال یہ ہے کہ کیا فینز اس بگڑی ہوئی لڑکی کو پسند کریں گے یا نہیں؟
سارہ خان گزشتہ 11 سال سے پاکستانی ٹی وی ڈراموں میں اداکاری کے جوہر دکھا رہی ہیں، انہوں نے کئی ہٹ ڈراموں میں کام کیا ہے، یہی وجہ ہے کہ ان کے فینز کی تعداد لاکھوں میں پہنچ چکی ہے۔ سارہ خان نے ہمیشہ اچھوتے کردار ادا کئے ہیں جن میں میرال اور زہرہ کی یادیں لوگوں کے دلوں میں ابھی بھی تازہ ہیں۔
مزید پڑھیں
فلموں اور ڈراموں میں چند ایکٹرز ہی ایسے ہوتے ہیں جن کی جوڑیاں ہٹ ہوجاتی ہیں، سارہ خان کی اداکار عمران اشرف کے ساتھ ڈراما سیریل رقص بسمل میں ایسی ہی جوڑی بنی تھی جسے شائقین نے بے حد پسند کیا تھا۔ گزشتہ کچھ عرصے سے سارہ خان اسکرین سے غائب تھیں، ڈراما سیریل وبال انہیں ٹی وی پر زیادہ نہیں دیکھا گیا۔ تاہم ناظرین اب بہت جلد انہیں عمران اشرف کے ساتھ ڈراما سیریل ’نمک حرام‘ میں ایک جاندار کردار اور ایک نئے روپ دیکیھیں گے۔
ڈراما ’نمک حرام‘ میں سارہ خان نے ایک مافیا باس کی ایک بگڑی ہوئی بیٹی کا کردار ادا کیا ہے۔ اس ڈراما سے لی گئی چند تصاویر سوشل میڈیا پر آئیں تو سارہ خان کے فینز بھی بہت پرجوش نظر آئے اور انہیں اس زبردست کم بیک پر مبارکباد دینے لگے جس سے ظاہر ہوتا ہے کہ سارہ خان کوئی بھی کردار ادا کریں، ان کے چاہنے والوں کو ان کا ہر انداز بھلا لگتا ہے۔
