استحکام پاکستان پارٹی (آئی پی پی) کے سینیئر رہنما عون چوہدری نے قائد مسلم لیگ ن نوازشریف کا ایئرپورٹ پر استقبال کرنے اور ان سے ملاقات پر وضاحت دے دی ہے۔
گزشتہ روز سابق وزیراعظم نوازشریف جب خصوصی طیارے کے ذریعے لاہور ایئرپورٹ پہنچے تو عون چوہدری بھی وہاں پر موجود تھے جہاں انہوں نے لیگی قائد سے ملاقات کی۔
نوازشریف کی وطن واپسی پر ایئرپورٹ جا کر ان سے ملاقات کرنے پر استحکام پاکستان پارٹی نے عون چوہدری سے وضاحت طلب کی ہے۔
تاہم عون چوہدری نے اب نجی ٹی وی سے گفتگو کرتے ہوئے وضاحت کی ہے کہ میں ذاتی حیثیت سے نوازشریف سے ملنے کے لیے لاہور ایئرپورٹ پر گیا تھا۔
انہوں نے کہاکہ سیاست سے ہٹ کر بھی انسان کا تعلق ہوتا ہے، میں سابق وزیراعظم شہبازشریف کی کابینہ کا ڈیڑھ سال تک حصہ رہا ہوں۔
انہوں نے نجی ٹی وی کو بتایا کہ نوازشریف سے ملاقات کے حوالے سے میں اپنی پارٹی لیڈر شپ کو وضاحت پیش کر دی ہے۔
