پا کستان آل فلیگز ٹوگیدر (اے ایف ٹی) پروگرام کے دوسرے ایڈیشن کی میزبانی کرے گا، اس سلسلے میں تقریب 2 نومبر جمعرات کو پاکستان نیشنل کونسل آف آرٹس (پی این سی اے) کے احاطے میں منعقد کی جائے گی۔
پروگرام کا انعقاد ڈیوکوم پاکستان، وزارت قومی ورثہ و ثقافت اور پی این سی اے کے تعاون سے کیا جا رہا ہے۔
اے ایف ٹی کی اس ایک روزہ تقریب کا مقصد ثقافتی سطح پر سفارتکاری اور اقوام متحدہ کے ممالک کے درمیان اتحاد کو فروغ دینا ہے۔ اتوار کو جاری ہونے والی ایک پریس ریلیز کے مطابق تقریب میں یوتھ کانفرنس، ماہرین کے ساتھ انٹرایکٹو پینل ڈسکشن، بین الاقوامی فوڈ اسٹالز، آرٹ اینڈ کرافٹ اور مختلف ثقافتی اداروں کے کام کی نمائش سمیت دیگر متعدد سرگرمیاں پیش کی جائیں گی۔
پریس ریلیز میں توقع ظاہر کی گئی ہے کہ اس تقریب میں 10 ہزار سے زیادہ شرکا شریک ہوں گے جن میں سفارت کار، اقوام متحدہ کے عہدیدار، نوجوان اور شہری شامل ہوں گے۔ اس تقریب میں داخلہ مفت داخلے ہو گا تاہم ہر ایک کو اپنی رجسٹریشن کرانا ہو گی۔
ڈیوکوم پاکستان کے ایگزیکٹو ڈائریکٹر منیر احمد نے اس بات پر زور دیا کہ اے ایف ٹی ایونٹ کا مقصد انسانی حقوق، ثقافتی ورثے کے تحفظ اور بین المذاہب ہم آہنگی، جمہوریت اور ترقی کے ذریعے امن کو فروغ دینے کی کوششوں میں اقوام متحدہ کی تنظیموں اور رکن ممالک کی مدد کرنا ہے۔
ان کا کہنا تھا کہ 24 اکتوبر کو اقوام متحدہ کا دن منانے کے لیے اتحاد اور افہام و تفہیم ضروری ہے تاکہ 1945 میں اقوام متحدہ کے چارٹر کے نفاذ کی سالگرہ منائی جا سکے۔
منیر احمد نے کہا کہ اے ایف ٹی ایونٹ کو سفارت کاروں، تارکین وطن، اقوام متحدہ اور دیگر ترقی پسند تنظیموں اور مقامی لوگوں کو اکٹھا کرنے کے لیے ایک روزہ تقریب کے طور پر ڈیزائن کیا گیا ہے تاکہ باہمی اور کثیر الجہتی ثقافتوں کے درمیان فرق کو پر کرنے کے لیے مربوط اور مشترکہ کوششوں کو فروغ دیا جاسکے۔
