وفاقی وزارت قانون و انصاف نے پراسیکیوٹر جنرل نیب احتشام قادر شاہ اور ڈپٹی چیئرمین نیب سہیل ناصر کی تعیناتیوں کا نوٹیفکیشن جاری کر دیا۔
نوٹیفکیشن کے مطابق پراسیکیوٹر جنرل نیب احتشام قادر شاہ کا اسٹیٹس سپریم کورٹ کے جج کے برابر ہو گا، تنخواہ و مراعات بھی اسی حساب سے ملیں گی۔
وزارت قانون نے وزارت خزانہ کو مراسلہ ارسال کرتے ہوئے سفارش کی ہے کہ نیب حکام نے سید احتشام قادر کو جج کے مساوی مراعات دینے کی درخواست کی ہے۔
وزارت قانون کے مطابق پراسیکیوٹر جنرل نیب کی تنخواہ و مراعات کے لیے وزرات خزانہ کی رضامندی لازمی ہے، وزارت خزانہ پراسیکیوٹر جنرل نیب کی مراعات کے لیے کابینہ سے منظوری لے۔
دوسری جانب وزارت قانون نے ڈپٹی چیئرمین نیب کی تنخواہ اور مراعات ہائی کورٹ کے جج کے برابر کرنے کی بھی سفارش کی ہے۔
واضح رہے کہ وفاقی کابینہ نے 11 اکتوبر کو سید احتشام قادر شاہ کی بطور پراسیکیوٹر جنرل نیب تعیناتی کی منظوری دی تھی۔
