چیئرمین تحریک انصاف عمران خان کی ہمشیرہ علیمہ خان نے کہا ہے کہ وہ اپنے بھائی کے ساتھ کھڑی ہیں اور انہیں اکیلا نہیں چھوڑیں گی، آج جو کچھ ہو رہا ہے وہ لندن میں ہونے والے معاہدے کے تحت ہو رہا ہے، عدالتیں اس معاہدے کا ساتھ دے رہی ہیں۔
اسلام آباد ہائیکورٹ کے باہر میڈیا سے گفتگو کرتے ہوئے چیئرمین تحریک انصاف عمران خان کی ہمشیرہ علیمہ خان نے کہا کہ ہم اپنے بھائی کے لیے کھڑے ہیں، اسے اکیلا تو نہیں چھوڑیں گے، پاکستان میں کوئی عدالت نہیں جو چیئرمین پی ٹی آئی کو انصاف دے سکے، پھر تو یہ ہونا چاہیے کہ ہم بھی جا کر جیل میں بیٹھ جائیں یہاں تو ہمارا کام ختم ہو گیا۔
علیمہ خان نے کہا کہ حفیظ اللہ نیازی سے ہماری فیملی کا گزشتہ 10 سال سے کوئی تعلق نہیں ہے، ہماری بہن کا بھی حفیظ اللہ نیازی سے اب کوئی تعلق نہیں، نہ اب وہ ہماری نمائندگی کر رہے ہیں۔ حفیظ اللہ نیازی ن لیگ کے خاص نمائندے کی حیثیت سے صدر پاکستان سے ملے ہوں گے۔
خان صاحب نے 24 تاریخ کو کہا تھا کہ یہ لندن معاہدہ پر عمل ہو رہا ہے اور اسکا ایک حصہ یہ بھی ہے کہ الیکشن کے دوران عمران خان کو جیل میں رکھا جائے اور شاید اس کے بعد بھی جیل میں رکھا جائے۔۔ علیمہ خان#انصاف_کا_جنازہ
— PTI (@PTIofficial) October 27, 2023
علیمہ خان سے سوال کیا گیا کہ کیا وہ عمران خان کی غیر موجودگی میں پی ٹی آئی کو لیڈ کریں گی؟ جواب میں انہوں نے کہا ’پی ٹی آئی تو ایک ‘پوری آرگنائزیشن ہے، عمران خان ہی پی ٹی آئی کے لیڈر ہیں، چاہے وہ جیل میں ہوں یا جیل سے باہر ہوں۔
ایک سوال کے جواب میں علیمہ خان نے کہا کہ چیئرمین پی ٹی آئی نے 24 اکتوبر کو جیل میں جو ہمیں کہا وہ سچ ثابت ہو رہا ہے۔ چیئرمین پی ٹی آئی نے کہا تھا کہ یہ لندن کا پلان نہیں بلکہ لندن میں معاہدہ ہوا تھا۔ اب جو کچھ ہو رہا ہے، اس معاہدے کے تحت ہو رہا ہے اور ہماری عدالتیں اس کا ساتھ دے رہی ہیں۔
ان کا کہنا تھا کہ لندن معاہدے کا ایک حصہ یہ ہے کہ چیئرمین پی ٹی آئی کو الیکشن میں جیل سے باہر نہیں آنے دینا، معاہدے کے تحت شاید الیکشن کے بعد بھی انہیں باہر نہ آنے دیا جائے۔
علیمہ خان نے کہا کہ میرا خیال ہے ہمیں عدالتوں سے کوئی امید نہیں رکھنی چاہے۔ وکلا اپنی کوششیں جاری رکھیں گے لیکن عوام کو کوئی امید نہیں رکھنی چاہیے۔
