کینیڈا کے صوبے اونٹاریو میں اس وقت انتہائی دلچسپ صورت حال پیدا ہو ئی جب ایک افریقی نسل کی نایاب اور خطرناک جیتا نما ’سر ول بلی‘ پنجرے سے فرار ہو گئی، پولیس نے فرار ہونے والی افریقی بلی کے بارے میں مقامی آبادی کو خبردار کرتے ہوئے کہا ہے کہ وہ پالتو جانوروں پر حملہ کر سکتی ہے۔
اونٹاریو کی صوبائی پولیس نے اوٹاوا کے مغرب میں آباد مقامی آبادی کو خبردار کیا ہے کہ وہ احتیاطی تدابیر اختیار کریں کیونکہ ایک افریقی نسل کی نایاب خطرناک ’سرول بلی‘ جنہیں گیزمو چھوٹا جیتا بھی کہا جاتا ہے، پنجرے سے فرار ہو گئی ہے۔
پولیس کے مطابق بلی کا وزن 20 سے 30 پاؤنڈ کے درمیان بتایا گیا ہے اور جو تصاویر فراہم کی گئی ہیں ان سے ظاہر ہوتا ہے کہ بلی سفید اور تنیش پیلے رنگ کی ہے جس پر سیاہ پٹیاں ہیں اور اس کے کان نوکدار ہیں اسے لِٹل ٹائیگر بھی کہا جاتا ہے۔
پولیس افسران نے میڈیا کو بتایا کہ شیرول بلی درمیانے سائز کے مویشیوں اور پالتو جانوروں پر حملہ کرنے کی صلاحیت رکھتی ہے، لہٰذا بونیچیر ویلی ٹاؤن شپ کے علاقے کے قریب مالکان کو محتاط رہنے کا مشورہ دیا جاتا ہے۔
جنگلی حیات سے متعلق ادارے بی سی ایس پی سی اے کے مطابق سرول بلیاں افریقہ کے بہت سے حصوں میں پائی جاتی ہیں اور اکثر شکار کے لیے ویٹ لینڈز میں گھومتی رہتی ہیں۔
ایجنسی کا کہنا ہے کہ جب انہیں پالتو جانوروں کے طور پر رکھا جاتا ہے تو ان کا طریقہ کار تبدیل ہو جاتا ہے۔ اگرچہ وہ درمیانے سائز کے کتے سے زیادہ بڑی نہیں ہوتیں لیکن وہ اپنی جنگلی جبلت کو برقرار رکھتی ہیں اور انتہائی چالاک اور بھاگنے میں انتہائی تیز رفتار ہوتی ہیں۔
حکام کا کہنا تھا کہ چاہے وہ گھر میں ہوں یا کسی مخصوص جگہ پر ہوں ان پر قابو پانا مشکل ہوسکتا ہے اور اگر وہ فرار ہو جائیں تو ان کے رکھوالوں، عوام اور مقامی جنگلی حیات کے لیے خطرہ بن سکتی ہیں۔
