بلوچستان کے ضلع ڈیرہ بگٹی کی تحصیل سوئی کے علاقے جنی بیری سے اغوا ہونے والے مزید 2 فٹ بالرز کو بازیاب کروالیا گیا۔
نگران وزیر اطلاعات بلوچستان جان اچکزئی نے وی نیوز سے بات کرتے ہوئے فٹ بالرز کے بازیاب ہونے کی تصدیق کی ہے۔
یہ بھی پڑھیں ڈیرہ بگٹی: اغوا ہونے والے 6 میں سے 4 فٹ بالرز بازیاب
بازیاب ہونے والے فٹ بالرز میں بابر علی اور شیزار خان شامل ہیں۔ دونوں کی بازیابی سے ان کے اہل خانہ انتہائی خوش ہیں۔
واضح رہے کہ ڈیرہ بگٹی سے سبی فٹ بال ٹورنامنٹ میں شرکت کے لیے جانے والے 6 مقامی فٹ بالرز 9 ستمبرکو کالعدم تنظیم بلوچ لبریشن ٹائیگر کی جانب سے اغوا کیے گیے تھے۔
اغوا ہونے والوں کی شناخت فٹ بالر عامر، فیصل، یاسر، سہیل احمد، شیراز اور بابر علی کے نام سے ہوئی تھی تاہم بلوچ لبریشن ٹائیگر کے جاری کردہ ایک بیان کے مطابق 29 ستمبر کو قبائلی عمائدین کی ضمانت پر 4 فٹ بالرز کو رہا کیا گیا تھا جن میں عامر، فیصل، یاسر اور سہیل احمد شامل تھے جبکہ 2 مغوی فٹ بالرز کو گزشتہ روز بازیاب کروا لیا گیا۔
