لاہور کی عدالت نے پنجاب اسمبلی میں بھرتیوں کے کیس میں سابق وزیراعلیٰ پنجاب و صدر پاکستان تحریک انصاف چوہدری پرویز الٰہی کو جوڈیشل ریمانڈ پر جیل بھیج دیا ہے۔
اینٹی کرپشن حکام نے 2 روزہ جسمانی ریمانڈ مکمل ہونے پر پرویز الٰہی کو عدالت میں پیش کیا اور مزید 10 روزہ جسمانی ریمانڈ کی استدعا کی جسے مسترد کر دیا گیا۔
عدالت میں پیشی کے موقع پر گفتگو کرتے ہوئے پرویز الٰہی نے کہا کہ کب سے سن رہے ہیں کہ انتخابات ہوں گے، چیف الیکشن کمشنر انتخابات کی تاریخ دیں۔
ان کا کہنا تھا کہ نگراں حکومت کس حیثیت سے بجٹ دے سکتی ہے۔
واضح رہے کہ گزشتہ سماعت پر اینٹی کرپشن حکام نے پرویز الٰہی کے گھر سے رقم برآمد کرنے کا دعویٰ کیا تھا جس کی بنیاد پر عدالت نے 2 روزہ جسمانی ریمانڈ منظور کیا تھا۔