چیئرمین پاکستان تحریک انصاف عمران خان نے قوم کے نام اپنے ایک حالیہ پیغام میں کہا ہے کہ اگر ہم اپنے نظام انصاف کو مکمل انہدام سے بچانا چاہتے ہیں تو ہمیں حرکت میں آنا ہو گا اور فی الفور اپنے قدم اٹھانا ہوں گے۔
عمران خان سے منسوب یہ پیغام سماجی رابطے کی ویب سائٹ ’ایکس‘ پر شائع ہوا ہے جس میں کہا گیا ہے کہ عمران خان نے یہ پیغام گزشتہ روز اپنے اہل خانہ کے ذریعے قوم کے نام بھجوایا ہے۔
چیئرمین پاکستان تحریک انصاف نے 31 اکتوبر 2023 کو اپنے اہلِ خانہ کے ذریعے پیغام بھجوایا کہ:
عدلیہ اور وکلاء پر یہ مقدس ذمہ داری عائد ہوتی ہے کہ وہ اُس دستور کے تحفّظ کا فریضہ سرانجام دیں جس پر ہماری قومی ترقّی کی بنیادیں استوار ہیں۔ لہٰذا لازم ہے کہ قانونی برادری پاکستان کے عوام…
— Imran Khan (@ImranKhanPTI) November 1, 2023
قوم کے نام اپنے نئے پیغام میں عمران خان نے کہا کہ عدلیہ اور وکلا پر یہ مقدس ذمہ داری عائد ہوتی ہے کہ وہ اس دستور کے تحفّظ کا فریضہ سرانجام دیں جس پر ہماری قومی ترقی کی بنیادیں استوار ہیں، قانونی برادری پاکستان کے عوام کے حقوق کے دفاع اور تحفظ کے لیے ایک تحریک برپا کریں۔
عمران خان کا مزید کہنا تھا کہ اس تحریک کے ذریعے عوام کے ووٹ کا حق محفوظ بنایا جائے اور انہیں اپنی قیادت کے انتخاب اور اپنے مستقبل کے تعین کا موقع دلوایا جائے، یہ ثانوی بات ہے کہ عوام کسے اپنی قیادت کے لیے منتخب کرتے ہیں، بنیادی معاملہ یہ ہے کہ انہیں اپنے نمائندوں کے انتخاب کا وہ بنیادی حق دیا جائے جو انہیں آئین فراہم کرتا ہے۔
مزید پڑھیں
چیئرمین پی ٹی آئی نے کہا کہ پاکستان اس وقت بلاشبہ ایک دوراہے پر کھڑا ہے، یہ وہ نازک موڑ ہے جہاں ہم اپنے نظام انصاف کو نہایت تیزی سے تباہی کے گھاٹ اترتے اور اس کا شیرازہ بکھرتے دیکھ رہے ہیں، اگر ہم عدل و انصاف کیلئے میدان میں نہیں نکلتے اور اپنے ججز کی پشت پناہی نہیں کرتے تو ہم اس ملک میں دستور کی بالادستی قائم نہیں کرسکیں گے۔
عمران خان نے کہا کہ اگر ہم نے آج حرکت نہ کی تو طاقت کی اس حکمرانی کے خلاف بھی کھڑے نہیں ہو پائیں گے جس کے تحت صرف طاقت کے لحاظ سے موزوں ترین اور امیر ترین ہی زندہ رہ سکتے ہیں۔
واضح رہے اس پیغام سے 4 روز قبل 27 اکتوبر کو بھی چیئرمین پی ٹی آئی نے جیل سے قوم کے نام ایک پیغام جاری کیا تھا جس میں انہوں نے پاکستان کے نظام انصاف سے مایوسی کا اظہار کرتے ہوئے کہا تھا کہ وہ اپنے نظام انصاف کی مکمل تباہی دیکھ رہے ہیں۔
عمران خان نے اپنے خلاف ’سلو پوائزننگ‘ کے خدشے کا اظہار کرتے ہوئے کہا تھا کہ ہماری جدوجہد فیصلہ کن مرحلے میں داخل ہو رہی ہے، آپ کو اپنے حقوق اور اپنے ملک کی آزادی کے لیے جدوجہد کرنا ہوگی۔
