بھارتی اداکار نواز الدین صدیقی کی اہلیہ عالیہ صدیقی نے اپنے اداکار شوہر پر ریپ کا الزام عائد کرتے ہوئے مقدمہ درج کروا دیا ہے۔
بھارت کے اخبار ہندوستان ٹائمز کے مطابق عالیہ صدیقی نے اپنے شوہر نواز الدین صدیقی پر ریپ کا مقدمہ درج کروا دیا ہے۔
عالیہ صدیقی نے اپنے انسٹا گرام اکائونٹ پر اداکار کو ’’ بدتمیز ‘‘ قرار دیا اور ان پر الزامات کی بوچھاڑ کردی۔
انھوں نے اپنے شوہر اور سسرال پر الزام عائد کیا کہ وہ ان کے بچوں کو اپنی تحویل میں لینا چاہتے ہیں۔ انسٹاگرام پر اپنی ویڈیو میں ان کا کہنا تھا کہ وہ ( نواز) طاقت سے مجھ سے بچے چھیننا چاہتا ہے ، وہ ایک بزدل باپ ہے۔ وہ اپنی طاقت کا ناجائز استعمال کر رہا ہے۔ اسے یہ نہیں پتہ کہ سب سے بڑی طاقت اوپر ہے۔ ان کا کہنا ہے کہ نوازالدین کو اس بات کا کوئی علم نہیں کہ بچوں کی پرورش کیسے ہوتی ہے ؟ اس کا بچوں کی پرورش میں کوئی کردار نہیں ہے ، اسے یہی نہیں پتہ کہ باپ ہونا کیا ہوتا ہے۔ انھوں نے نواز الدین صدیقی سے کہا کہ تم پیسے سے کتنے لوگوں کو خرید لو گے ، لیکن میرے بچے نہیں چھین سکتے۔ کبھی نہیں چھین سکتے۔
انسٹا گرام پر ہندی زبان میں لکھی گئی پوسٹ میں عالیہ صدیقی نے کہا کہ گزشتہ روز ورسووا تھانے میں ریپ کا مقدمہ ( شواہد کے ساتھ ) درج کروایا ہے۔ میں اپنے معصوم بچوں کو ان سنگدل لوگوں کے ہاتھوں میں نہیں جانے دوں گی۔
واضح رہے کہ اس سے قبل بھی عالیہ صدیقی اپنے شوہر پر سنگین الزامات عائد کرچکی ہیں کہ وہ انھیں کھانا ، بستر حتیٰ کہ باتھ روم بھی استعمال کرنے کی اجازت نہیں دیتا تھا۔
یاد رہے کہ نواز الدین صدیقی اور عالیہ صدیقی کی سن دو ہزار دس میں شادی ہوئی تھی ، ان کے دو بیٹے ہیں۔ سن دو ہزار اٹھارہ میں دونوں کے درمیان اختلافات پیدا ہو گئے ، عالیہ نے عدالت میں خلع کا دعویٰ دائر کردیا تھا ۔ بعد ازاں دونوں کے مابین صلح ہوگئی۔
تاہم سن دوہزار اکیس میں دونوں نے علیحدگی کا اعلان کردیا۔
