عمران خان کو چاہیے تھا کہ سیاسی ماحول میں تحمل سے کام لیتے، چیف الیکشن کمشنر

چیف الیکشن کمشنر سکندر سلطان راجہ نے کہا ہے کہ اس بات میں کوئی شک نہیں کہ چیئرمین پی ٹی آئی ملک کے مقبول لیڈر  ہیں، وہ ملک کی ایک جماعت کے سربراہ ہیں لیکن ان کو چاہیے تھا کہ تحمل سے کام لیتے۔

چیئرمین پی ٹی آئی کی دل سے عزت کرتا ہوں

اسلام آباد میں صحافیوں سے گفتگو کرتے ہوئے چیف الیکشن کمشنر کا کہنا تھا کہ میں چیئرمین پی ٹی آئی کی دل سے عزت کرتا ہوں، خواہش تھی تمام سیاست دانوں کو ساتھ بٹھاتا، میں ماضی میں چیئرمین پی ٹی آئی کو آئیڈیلائز کرتا تھا، خواہش تھی چیئرمین پی ٹی آئی سیاسی ماحول میں تحمل پرمبنی کردار ادا کرتے۔

صدر سے نہ ملنے کا فیصلہ کمیشن کا تھا

چیف الیکشن کمشنر سکندر سلطان راجہ نے کہا کہ انہوں نے صدر سے ملنے سے انکار نہیں کیا، نہ ملنے کا فیصلہ کمیشن کا تھا، سپریم کورٹ میں کمیشن نے 11 فروری کی تاریخ دی تھی، صدر مملکت کو بھی خط میں یہی تاریخ دی تھی لیکن 8 فروری کو عام انتخابات کا متفقہ فیصلہ ہوا۔

سب کہتے ہیں الیکشن شفاف ہوں لیکن مداخلت بھی کی جاتی ہے

چیف الیکشن کمشنر کا کہنا تھا کہ  پہلے  بھی فروری میں الیکشن ہوتے رہے ہیں، سارے ادارے محترم ہیں لیکن الیکشن کمیشن اپنے مؤقف پر کھڑا ہے، خیبر پختونخوا اور  پنجاب اسمبلی تحلیل ہوئی تو الیکشن کمیشن نےکہا کہ پورےملک میں انتخابات ایک ساتھ ہوں، ہر کوئی کہتا ہے الیکشن شفاف ہوں لیکن دوسری جانب مداخلت بھی کی جاتی ہے۔

پولنگ اتوار کو نہیں ہوگی، اسی بہانے ایک اور چھٹی مل جائے گی

انہوں نے کہا کہ صدر نے ہمیں اچھے طریقے سے استقبال کیا جس کی تصاویر سب کے سامنے ہیں، ہماری کوشش تھی کہ اتوار کا روز پولنگ کے لیے اچھا رہے گا، جب 4 لوگ مل کر بیٹھتے ہیں تو گنجائش نکل آتی ہے، انتخابات میں فوج ہماری مدد کرے گی۔

پولنگ ڈے اتوار کو نہ رکھے جانے کے سوال پر چیف الیکشن کمشنر نے کہا، ’چلیں اس بہانےاسکول کے بچوں کو ایک اور چھٹی مل جائےگی‘۔