سپریم کورٹ نے لاہورہائیکورٹ کو کلرکہارمیں جوڈیشل کمپلیکس کی باغ صفا میں تعمیر روکتے ہوئے جوڈیشل کمپلکس کی منظوری اور تعمیرسے متعلق مکمل ریکارڈ طلب کرلیا ہے۔
چیف جسٹس قاضی فائز عیسی نے معاملہ کی مکمل چھان بین کا حکم دیتے ہوئے کلر کہارجوڈیشل کمپلیکس سے متعلقہ ریکارڈ کی فراہمی تک باغ صفا کلر کہار پر جوڈیشل کمپلکس کی مزید تعمیر روکنے کی تاکید کی ہے اور فوری معلومات فراہمی کا حکم دیا ہے۔
رجسٹرار سپریم کورٹ کی جانب سے لاہورہائیکورٹ کے رجسٹرارکو لکھے خط میں بتایا گیا ہے کہ ڈان اخبار نے رپورٹ کیا ہے کہ باغ صفا کلرکہار پرجوڈیشل کمپلیکس تعمیر کیا جا رہا ہے، اس ضمن میں بتایا جائے کہ آیا یہ خبر درست ہے کہ نہیں۔
خط میں کہا گیا ہے کہ اگر یہ خبر درست ہے تو بتایا جائے کہ ایک قدیم پارک کی اراضی کو جوڈیشل کمپلکس میں کیوں تبدیل کیا جارہا ہے اور اس سے قبل کلر کہار میں ہی لاہور ہائیکورٹ کو ٹرانسفر کی گئی 80 کنال زمین کا کیا بنا۔
چیف جسٹس قاضی فائز عیسی کی ہدایت پر رجسٹرار نے لاہور ہائیکورٹ سے مذکورہ جوڈیشل کمپلیکس کی تعمیر اور بلڈنگ اور ایڈمنسٹریٹیو کمیٹیز کی جانب سے منظوری سمیت تمام ریکارڈ بھی طلب کرلیا ہے۔
