ذخیرہ اندوزوں کے خلاف ملک بھر میں حکومتی کریک ڈاؤن کامیابی سے جاری ہے، گزشتہ ایک ہفتے میں ہزاروں میٹرک ٹن چینی، آٹا اور کھاد برآمد کیا گیا ہے۔
وفاقی نگراں حکومت، سیکیورٹی فورسز اور عسکری قیادت نے ملکی سالمیت اور معیشت کی بحالی کے پیش نظر سخت اقدامات کرنے کا فیصلہ کیا تھا اور حکومتی ایماء پر ماہ ستمبر سے ملک بھر میں ذخیرہ اندوزوں کے خلاف آپریشن کا آغاز کیا گیا تھا۔
ذخیرہ اندوزوں کے خلاف 29 اکتوبر سے 5 نومبر تک کے اعداد و شمار کے مطابق ملک بھر سے کثیر مقدار میں کھاد، آٹا اور چینی برآمد ہوئی ہے۔
آپریشن کے دوران ملک بھر سے 6599 میٹرک ٹن کھاد، 2367 میٹرک ٹن آٹا اور 6996 میٹرک ٹن چینی بھی برآمد ہوئی۔
نگراں حکومت اور عسکری قیادت نے ملک میں معاشی استحکام لانے تک ایسی کاروائیاں جاری رکھنے کے عزم کا اظہار کیا ہے۔
واضح رہے کہ رواں سال ستمبر میں نگراں وزیر اعظم انوار الحق کاکڑ کی زیر صدارت خصوصی سرمایہ کاری سہولت کونسل (ایس آئی ایف سی) کے اجلاس میں متفقہ طور پر فیصلہ کیا گیا تھا کہ تمام فیصلے ملک کے وسیع تر مفاد میں کیے جائیں گے اور اسمگلنگ و ذخیرہ اندوزی کی لعنت سے آہنی ہاتھوں سے نمٹا جائے گا۔
نگراں وفاقی حکومت کی ہدایت پر امریکی ڈالر کی اسمگلنگ، ذخیرہ اندوزی کے خلاف بڑے پیمانے پرکریک ڈاؤن کا آغاز کیا گیا تھا جس کے باعث ڈالڑ کی قدر میں نمایاں کمی دیکھی گئی اور پاکستانی روپے کی قدر قدرے بہتر ہوئی۔
