احتساب عدالت لاہور نے سابق وزیر اعلی پنجاب عثمان بزدار کو 3 مارچ کو نیب میں پیش ہونے کا حکم دے دیا۔
میڈیا رپورٹ کے مطابق احتساب عدالت لاہور میں آمدن سے زائد اثاثہ جات انکوائری کیس کی سماعت ہوئی،عثمان بزدار عبوری ضمانت کی معیاد ختم ہونے پر احتساب عدالت لاہور میں پیش ہوگئے،احتساب عدالت لاہور نے عثمان بزدار کی ضمانت پر دلائل دینے کا حکم دے دیا۔
پراسیکیوٹر نیب نے کہاکہ عثمان بزدار نے تاحال انکوائری کو جوائن نہیں کیا، عدالت نے عثمان بزدار سے استفسار کیا کہ آپ نے انکوائری کیوں جوائن نہیں کی؟اگر آپ انکوائری جوائن نہیں کریں گے تو ضمانت مسترد کرنے کیلئے یہی کافی ہے،احتساب عدالت نے ہدایت کرتے ہوئے کہاکہ انکوائری آج ہی جوائن کریں۔
وکیل عثمان بزدار نے استدعا کرتے ہوئے کہاکہ ڈیرہ غازی خان میں تقریب ہے کچھ وقت فراہم کرے، ہمیں اگلے ہفتے تک کی مہلت دے دیں، عدالت نے عثمان بزدار کے وکیل کے جواب پر اظہار برہمی کیا۔
عدالت نے کہاکہ جو انکوائری جوائن نہیں کر رہے وہ عدالت سے کیا ریلیف چاہتے ہیں؟میں اگر تین دن کا وقت دوں تو پھر کیا کریں گے؟
احتساب عدالت لاہور نے 3 مارچ کو عثمان بزدار کو نیب پیش ہونے کی ہدایت کر دی،عدالت نے عثمان بزدار کی جانب سے تمام ریکارڈ کو نیب انکوائری کا حصہ بنانے کی ہدایت کردی۔
آمدن سے زائد اثاثہ جات انکوائری کیس میں احتساب عدالت نے نیب پراسیکیوٹر سے مکالمہ کرتے ہوئے کہاکہ آپ ویسے ہی گرفتار کرلیں،جج نے کہاکہ درخواست گزار کو معلوم ہی نہیں کہ اس پر الزام کیا ہے وہ جواب کیا دے گا۔
عدالت نے پراسیکیوٹر نیب سے استفسار کیا کہ کیا عثمان بزدار کاکیس 50 کروڑ روپے تک جاتا ہے؟ نیب تفتیشی افسر نے عدالت کو جواب دیتے ہوئے کہاکہ نہیں ابھی یہ تعین نہیں ہوا، عدالت نے استفسار کیاکہ اگلی سماعت پر بتائیں کہ یہ تفتیش کیسے شروع ہوگئی؟
نیب تفتیشی افسر نے کہاکہ عثمان بزدار کے خلاف 10 ارب روپے کی شکایت موصول ہوئی، عدالت نے استفسار کیا کہ عثمان بزدار نے کیا اثاثے بنائے اور کس کے نام پربنائے ؟ نیب تفتیشی افسر نے کہاکہ عثمان بزدار نے والد اور فیملی کے نام پر اثاثے بنائے۔
عثمان بزدار نے کہا کہ میرے والد وفات پا چکے ہیں، میرے پورے قبیلے کے 10 ارب روپے کے اثاثے نہیں ۔
احتساب عدالت لاہور نے عثمان بزدار کیخلاف شکایت کی کاپی مانگ لی، عدالت نے کہاکہ نیب نے کیسے انکوائری شروع کر دی جس میں شکایت گزار کا پتہ ہی نہیں ہے،احتساب عدالت لاہور نے عثمان بزدار کو کاپی فراہم کرنے کا حکم دیدیا۔
نیب پراسیکیوٹر نے عثمان بزدار کو کاپی فراہم کرنے کی مخالفت کر دی،نیب پراسیکیوٹر نے کہاکہ قانون کے مطابق 6 ماہ تک شکایت کی کاپی نہیں دے سکتے، احتساب عدالت لاہور نے نیب کا قانون پڑھ کر سنانے کی ہدایت کی،عدالت نے کہا کہ قانون میں یہ تو نہیں لکھا کہ 6 ماہ کے بعد شکایت کی کاپی فراہم کرنا ہے۔
