انٹرنیشنل کرکٹ کونسل (آئی سی سی) بورڈ نے سری لنکا کرکٹ کی آئی سی سی کی رکنیت فوری طور پر معطل کر دی ہے۔
تفصیلات کے مطابق آئی سی سی بورڈ کے آج کے اجلاس میں اس بات کا تعین کیا گیا کہ سری لنکا کرکٹ نے بطور ممبر اپنی ذمہ داریاں ادا کرنے میں بری طرح ناکام ہوا ہے۔
آئی سی سی بورڈ نے کہا ہے کہ سری لنکا کرکٹ خاص طور پر اپنے معاملات کو خود مختار طریقے سے چلانے اور سری لنکا میں کرکٹ کی گورننس، ریگولیشن اور انتظامی امور میں حکومتی مداخلت نہ ہونے کو یقینی بنانے میں ناکام رہا ہے۔ آئی سی سی بورڈ نے کہا ہے کہ سری لنکا کرکٹ کی معطلی کی شرائط کا فیصلہ آئی سی سی بورڈ مناسب وقت پر کرے گا۔
مزید پڑھیں
واضح رہے بھارت میں جاری آئی سی سی کرکٹ مینز ورلڈ کپ میں بھارت کے ہاتھوں سری لنکا کی 302 رنز کی شرمناک شکست کے بعد وزیر کھیل روشن رانا سنگھے نے سری لنکن کرکٹ بورڈ حکام سے استعفوں کا مطالبہ کیا تھا۔ بورڈ سیکریٹری موہن ڈی سلوا کے استعفیٰ کے اگلے روز ہی وزیر کھیل نے کرکٹ بورڈ کو برطرف کر دیا تھا۔
سری لنکن میڈیا کے مطابق وزیر کھیل روشن رانا سنگھے نے سری لنکا کرکٹ کے لیے عبوری کمیٹی تشکیل دی تھی۔ 1996 کا ورلڈ کپ جیتنے والے کپتان ارجنا رانا ٹنگا کو نئے عبوری بورڈ کا چیئرمین مقرر کیا گیا تھا۔ نئے 7 رکنی پینل میں سپریم کورٹ کے ایک ریٹائرڈ جج اور بورڈ کے ایک سابق صدر بھی شامل تھے۔
