پاکستان، فیفا ورلڈکپ 2026 کوالیفائر کے دوسرے مرحلے کا میچ 16 نومبر کو میزبان سعودی عرب کے خلاف کھیلے گا۔ قومی فٹبال ٹیم کوالیفائر میچ کے لیے سعودی عرب روانہ ہوگئی ہے۔ قومی ٹیم نے اسلام آباد ایئر پورٹ سے سعودی شہر دمام کے لیے اڑان بھری۔
یاد رہے کہ پاکستان فٹبال ٹیم نے فیفا ورلڈکپ 2026 کےکوالیفائنگ راؤنڈ میں کمبوڈیا کو شکست دے کر پہلی بار ورلڈکپ کوالیفائرز کے دوسرے مرحلے کے لیے کوالیفائی کیا تھا۔
17 اکتوبر 2023 کو پاکستان اسپورٹس کمپلیکس اسلام آباد کے جناح اسٹیڈیم میں ہونے والے میچ میں پاکستان نے کمبوڈیا کو صفر کے مقابلے میں ایک گول سے شکست دی تھی، پاکستان کی جانب سے واحد گول 69 ویں منٹ میں ہارون حامد نے اسکور کیا تھا۔
عالمی درجہ بندی میں 197ویں نمبر پر موجود پاکستان فٹبال ٹیم نے کبھی بھی ورلڈکپ کوالیفائر میچ نہیں جیتا تھا۔ پاکستان کی شاندار کامیابی پر جناح اسٹیڈیم میں ہزاروں شائقین نے جیت کا بھرپور جشن بھی منایا تھا۔
پاکستان نے پہلی بار ورلڈکپ کوالیفائرز کے دوسرے راؤنڈ کے لیے کوالیفائی کیا ہے، اگلے مرحلے میں پاکستان فٹبال ٹیم کا مقابلہ 16 نومبر 2023 کو سعودی عرب سے، 21 نومبر 2023 کو اسلام آباد میں تاجکستان سے اور 24 مارچ 2024 کو اردن کے ساتھ جناح اسٹیڈیم اسلام آباد میں ہوگا۔
واضح رہے کہ ہوم اینڈ اوے کی بنیاد پر کمبوڈیا میں کھیلا جانے والا پہلا کوالیفائنگ میچ بغیر کسی گول کے برابر رہا تھا۔ جبکہ اسلام آباد میں کھیلا گیا میچ پاکستان میں 8 برس بعد کھیلے جانے والا پہلا عالمی میچ تھا۔ اسی طرح 12 برس بعد پاکستان میں فیفا فٹبال ورلڈ کپ کا کوئی بھی کوالیفائر میچ کھیلا گیا تھا۔
