پاکستان سپر لیگ کی ڈرافٹنگ کے بعد سیزن میں کسی بھی ٹیم کے لیے منتخب نہ ہونے پر اوپننگ بلے باز احمد شہزاد نے کرکٹ کو الوداع کہہ دیا۔ انہوں نے کہا کہ نیشنل ٹی 20 کپ اور ڈومیسٹک کرکٹ میں اچھا پرفارم کرنے کے باوجود پی ایس ایل میں شامل نہ کرنا باعث تشویش ہے۔
A heartfelt goodbye! pic.twitter.com/7NdjpCXjeR
— Ahmad Shahzad 🇵🇰 (@iamAhmadshahzad) December 15, 2023
سابق اوپننگ بلے باز احمد شہزاد نے سوشل میڈیا سائٹ ایکس پر پوسٹ کرتے ہوئے لکھا کہ نیشنل ٹی 20 کپ اور ڈومیسٹک کرکٹ میں ان کو شامل نہ کرنا باقاعدہ منصوبہ بندی کے تحت کیا گیا، کیوںکہ پی ایس ایل فرنچائزز نے ان سے بری پرفارمنس کرنے والے پلیئرز کو بھی اٹھایا ہے جبکہ ان کی پرفارمنس بہترین رہی تھی۔
انہوں نے اپنے فینز کو مخاطب کرتے ہوئے لکھا کہ اس ساری صورت حال سے وہ خود تو پہلے سے ہی واقف ہیں لیکن جلد وہ اپنے فینز اور دیگر کرکٹ شائقین کو اس کے بارے میں آگاہ کریں گے۔ تاہم انہوں نے پاکستان سپر لیگ (پی ایس ایل) سے راہیں جدا کرتے ہوئے خود کو باعزت طور پر الگ کر دیا۔
’نہ کبھی پیسے کے لیے کھیلا ہوں اور نہ کبھی پیسے کے لیے کھیلوں گا۔‘
احمد شہزاد نے کہا کہ انٹرنیشنل لیگز کی جانب سے آفر ہونے کے باوجود وہ نہیں کھیلیں گے کیوں کہ وہ ہمیشہ گرین شرٹ پہن کر کھیلنے میں فخر محسوس کرتے ہیں۔ تاہم انہوں نے آئندہ کے لیے پی ایس ایل کی ان 6 ٹیموں کا حصہ بننے سے انکار کرتے ہوئے کہا کہ تمام فرنچائزز نے مل کر ان کو پی ایس ایل سے باہر کرنے میں اپنا کردار ادا کیا ہے۔
تاہم انہوں نے اپنے فینز کا شکریہ ادا کرتے ہوئے کہا کہ زندگی میں جو کچھ بھی حاصل کیا اس کے لیے اللہ اور اپنے فینز کا شکر گزار ہوں، ہمیشہ اپنے ملک کی سربلندی کے لیے کھیلا ہوں اور کبھی بھی اس ملک کو نیچا نہیں ہونے دوں گا۔ ایمانداری کی یہی قیمت ادا کرنا تھی تو ملک کے لیے یہ ایک بہت چھوٹا سا کام ہے۔ پاکستان زندہ باد