پاکستان پیپلزپارٹی نے کہا ہے کہ پیپلزپارٹی انتخابات کے لیے تیار ہے اور ہم بھرپور طریقے سے انتخابی مہم چلائیں گے۔ دیگر جماعتیں الیکشن سے بھاگتی ہوئی نظر آ رہی ہیں۔
بلاول بھٹو کی زیرصدارت اجلاس کے بعد کراچی میں پریس کانفرنس کرتے ہوئے پیپلزپارٹی کی سینیئر رہنما شیری رحمان، سابق صوبائی وزیر شرجیل میمن اور شازیہ مریہ نے کہاکہ 27 دسمبر کو گڑھی خدا بخش میں جلسے سے انتخابی مہم کا آغاز کیا جائے گا۔
شیری رحمان نے کہاکہ بلاول بھٹو کی زیر صدارت اجلاس میں 8 فروری کو انتخابات کے عدالتی فیصلے کو سراہا گیا۔
انہوں نے کہاکہ ہم چاہتے ہیں کہ سب کو لیول پلیئنگ فیلڈ ملے اور انتخابات وقت پر ہوں۔
شرجیل میمن نے کہاکہ اس وقت ہم سب کو متحد ہونے کی ضرورت ہے تاکہ پاکستان آگے بڑھ سکے، بلاول بھٹو نے کہا ہے کہ ہم نفرت کی سیاست کو مسترد کرتے ہیں مگر کچھ سیاسی جماعتوں کے لیڈران اب بھی ایسی ہی باتیں کر رہے ہیں۔
انہوں نے کہاکہ پی پی چیئرمین لوگوں کو ریلیف دینے کی بات کر رہے ہیں اور چاہتے ہیں کہ سب مل کر ملک کو آگے لے کر جائیں۔ ہم بھرپور طریقے سے اپنی الیکشن مہم چلائیں گے۔
مزید پڑھیں
شرجیل میمن نے کہاکہ پیپلزپارٹی کے علاوہ دیگر سیاسی جماعتیں الیکشن سے بھاگ رہی ہیں۔ عوام کو اپنے نمائندے منتخب کرنے کا اختیار ہے۔ ہم 27 دسمبر کو گڑھی خدا بخش میں جلسے کے بعد ملک بھر میں انتخابی مہم چلائیں گے۔
واضح رہے کہ عام انتخابات کا شیڈول جاری ہونے کے بعد تمام سیاسی جماعتوں نے لنگوٹ کس لیے ہیں اور انتخابات کی تیاریوں میں مصروف ہیں۔