پیپلز پارٹی کے رہنما عاجز دھامرا نے کہا ہے کہ میاں صاحب! سندھ کے عوام کسی کا قبضہ قبول کرنے کے لیے تیار نہیں۔ بلاول بھٹو اور آصف زرداری ملک کو سیاسی بحران سے نکالنا چاہتے ہیں۔ تمام پارٹیوں کے پاس اتحاد کرنے کے باوجود پولنگ ایجنٹ تک نہیں ہوگا۔ ہر دور میں ہمارے خلاف اتحاد بنتے رہے ہیں۔
کراچی میں شہلا رضا کے ہمراہ پریس کانفرنس کرتے ہوئے عاجز دھامرا نے کہا کہ امید ہے الیکشن کمیشن پولنگ ڈے تک قوم کے اعتماد پر پورا اترے گی۔ امید ہے سپریم کورٹ نے الیکشن کمیشن کو جو ہدایت دی ہے اس پر عمل ہوگا۔ الیکشن کمیشن اپنےکام میں سست ہوتا ہے تو لوگ درخواستیں لیکر عدالت جاتے ہیں۔
عاجز دھامرا کا کہنا تھا کہ پیپلز پارٹی واحد پارٹی ہے جس نے الیکشن کرانے کا مطالبہ کیا۔ الیکشن مہم سے متعلق بلاول بھٹو متحرک کردار ادا کر رہے ہیں۔ چیئرمین پیپلز پارٹی پورے پاکستان کو سندھ بنانا چاہتے ہیں۔ ہم پر اس بات کو لے کر تنقید کی جا رہی ہے۔
مزید پڑھیں
ان کا کہنا تھا کہ پیپلزپارٹی سے ترقیاتی کاموں سے متعلق مقابلہ کرنا ہے تو کریں۔ موقع دیا جائے پیپلز پارٹی دوسرے صوبوں کو ثابت کرے گی کہ سندھ میں کتنی ترقی کی ہے۔ اسلام کوٹ ایئر پورٹ کو سندھ نے اپنے اخراجات سے بنایا، اسلام کوٹ میں فری بجلی فراہم کی جاتی ہے
عاجز دھامرا کا کہنا تھا کہ تھر کی بجلی فیصل آباد بھیج رہے ہیں۔ سندھ کی معیشت کو تباہ کرنے کی سازش ہو رہی ہے۔ آج کسانوں اور کاشتکاروں کو کھاد نہیں مل رہی۔ پلیجو صاحب پیپلز پارٹی پر تنقید کر رہے ہیں۔ سندھ کی معیشت کو تباہی کے کنارے پر کھڑا کر دیا گیا ہے۔
انہوں نے کہا کہ نگراں حکومت کوئی کام نہیں کر رہی۔ وہ سیاسی پارٹیاں جنہوں نے اناڑی ڈرائیور بٹھایا ہوا ہے اپنی خیر منائیں۔ ہم پر ناکام حملے کرتےکرتے اپنی وکٹیں گراتے جا رہے ہیں۔ آصف زرداری نے گورنر ہاؤس خیبرپختونخوا میں بزنس کمیونٹی سے ملاقات کی۔
